Andrew Hoo ta e Alto Comisario interino nobo di Cuerpo Policial Aruba

ORANJESTAD – Andrew S. Hoo ta e Alto Comisario nobo di Cuerpo Policial Aruba. Minister di Husticia Andin Bikker a anuncia esaki diahuebs merdia, indicando cu Hoo lo ta e reemplazante di Alto Comisario Dolfi Richardson como Alto Comisario interino pa un periodo defini. Esaki mientras cu e proceso di solicitud pa un Alto Comisario fiho cuminsa. Cu esaki, Hoo ta reintegra den e cuerpo, despues di a laga esaki algun tempo atras pa bay den sector priva.

CAMBIO

E cambio a keda anticipa basta tempo, ora cu gobierno nobo a sinta, cu e pensamento cu Richardson mester a haya un otro ubicacion, creando un espacio pa un hefe nobo di polis. Richardson awor ta cuminsa lidera e departamento di Interpol na Aruba. Hoo, lo asumi e funcion interino te ora cu un Alto Comisario nobo keda selecta. Hoo mes, manera minister Bikker a bisa, por solicita tambe pa e funcion permanente.

CURICULO

Hoo tin un trayectoria largo den husticia. El a cuminsa den Cuerpo Policial Aruba na aña 2001 pues e tin un diploma MBO politieopleiding niv. 4, Politie Academie te Appeldoorn, Bachelor Of Science Hotel Administration, Associate of Science Hotel Management y Executive Master of Tactical Policing major in General Leadership. Hoo ta un persona professional y dedica na su trabou.

PERSONAL

Hoo ta casa y tin dos yui. Un persona dedica na su famia. Despues di a bai forma parti di e famia di Marriott Hotel Aruba como Complex Director of Loss Prevention and Risk Management. . Hoo ta bolbe su cas bek na unda el a sirbi su pais cu honor y passion pero e biaha aki e ta cla pa fungi den e posicion di Alto Comisario di nos Cuerpo Policial Aruba. Un persona cu conocemento amplio den e parti hudicial, industria di turismo y seguridad. Aruba por ta orguyoso pa ricibi un hoben professional y studia pa asumi e responsabilidad di nos Cuerpo Policial Aruba.