SER: Gobierno mester scucha SER prome cu ahusta salario minimo

ORANJESTAD - Via e medionan di comunicacion Sociaal Economische Raad (SER) a tuma nota di e intencion di gobierno di Aruba pa aumenta e salario minimo den 2018 como tambe e intencion di Gobierno di Aruba pa instala un comision tri-partite den cual SER lo forma parti di dje. Asina e instancia consultativo ta reacciona den un comunicado diaranson. Nan no ta bisa sinembargo si nan ta pro of contra e decision di gobierno.

PROCESO

E proceso di aumento di salario minimo ta ancra den ley esta e articulo 13 di e Landsverordening Minimumlonen, den cual ta stipula bou di cua circunstancia gobierno por aumenta e salario minimo i cu mester scucha (conseho di ) SER prome cu bay over na ahusta/aumenta e salario minimo.

PETICION

E manera usual ta cu den fin di aña, SER ta ricibi un peticion di Minister di Labor pa un conseho ariba un posible ahustacion/aumento di e salario minimo entrante 1 di januari di e aña venidero. Sinembargo e Minister di Labor por aumenta e salario minimo tambe durante aña si e ta haya cu tin circunstancia special esta “bijzondere omstandigheden”. Na momento cu SER ricibi un peticion pa conseha ariba aumento di salario minimo, SER ta start un investigacion pa evalua y analisa desaroyonan i expectativanan di (cremento) economico relevante na i pa Aruba, pa asina duna un conseho tocante un ahustacion/aumento di e salario minimo.

COMISION TRIPARTITE

Pa loke ta trata e intencion di Gobierno di Aruba pa instala un comision tri-partite den cual SER lo forma parti di dje, SER a comunica su posicion y conseho na tanto Prome Minister como na Minister di Labor ariba punto specifico esaki.