CITGO: Tur contratista di e refineria mester cumpli cu ley y regulacion local

SAN NICOLAS – Asunto di permiso di trabou ta keda pa responsabilidad di contratista. Asina ta un indicacion cu e refineria CITGO Aruba Refinery ta pensa. Por lo menos segun nan comunicado. Tur contratista di CITGO Aruba Refinery mester cumpli cu ley y regulacion local. Esaki tabata e prome y unico reaccion di e refineria riba e inval haci recientemente na e mancamp riba e tereno di refineria, y unda cu a bay cu un cantidad di persona cu no tabatin permiso di trabou den nan poder. Manera ta conoci, y admiti pa CITGO, riba februari 26 oficialnan di gobierno di Aruba representando varios departamento a bishita e man camp di CITGO Aruba Refinery pa un inspeccion. “ Durante e inspeccion nan a tuma nota di varios contratista den e proceso di demobilisacion a consecuencia di e anuncio recien di un slowdown den e projecto di rehabilitacion di e refineria. CITGO Aruba a duna tur cooperacion durante e inspeccion aki y lo sigui haci esaki” e compania a bisa den un comunicado chikito. “ Mas aleu, e compania ta exigi pa tur empleado y contratista cumpli cu ley- y regulacionnan local”, e compania a finalisa bisando.