Bermudez: Entrega presupuesto supletorio 2014 diaranson awor

ORANJESTAD – Gobierno di Aruba tin pensa di entrega e presupuesto 2014 cambia y adapta, mas probable diaranson awor. Esaki e minister di finanza di Aruba, Angel Bermudez a confirma na NoticiaCla.com den fin di siman. “Nos no ta cla ainda cu e re calculacion” Bermudez a sigura NoticiaCla.com. Nan ta spera cu pa diaranson esaki por ta cla pa wordo entrega. E la mustra tambe cu ta wardando minister president bolbe Aruba pa por finalisa tur cos.

E mandatario mes momento tabatin un otro interpretacion riba e KB pa cu e notificacion na gobernador, cu segun e KB, mester a tuma lugar diabierna ultimo mas tarda. “E KB ta invita nos pa haci cambio. Ora nan ta cla, ta avisa gobernador” Bermudez a sigui bisa NoticiaCla.com. Esey ta nifica cu nan no a notifica gobernador ainda, manera cu e KB ta informa (lesa e detayes di e parti ey di e KB aki) . E mandatario a confirma na NoticiaCla.com cu 3 di october e deadline ta, pero cu nan por haci esaki pues, probablemente diaranson awor. E la confirma tambe cu esaki ta nifica cu ‘sowieso ta bin un supletorio 2014” di e presupuesto.

Tur esaki ta confirma e informacion cu NoticiaCla.com a publica siman pasa cu tabata indica cu mientras cu e no a bisa esey den palabranan exacto siman pasa, minister di finanza Angel Bermudez a duna ‘indicacion’ diahuebs cu gobierno di Aruba tabata preparando y/of ta dispuesto pa entrega un presupuesto modifica proximamente, basa riba e recomendacionnan di e secretariado di College Financieel Toezicht. Cu esey, gobierno ta cumpli cu e articulo 3 di e Aanwijzing (KB) di 11 di july ultimo.