Ex coordinadornan di Gabinete Mike Eman II ta perde caso den corte

ORANJESTAD – Un grupo di ex coordinador di Gabinete Mike Eman II a perde nan caso den corte, den sentido cu huez a declara e peticion no admisibel pa e status cu e trahadonan tin. . Dia 26 februari ultimo tabatin decision den corte di prome instancia relaciona cu e caso cu un grupo di persona cu a haya un contract na fin di Gabinete Mike Eman II a cuminsa contra gobierno a base di nan carta di retiro ricibi na momento cu Gabinete Wever-Croes I a tuma mando.

PETICION

E grupo en cuestion a pidi hues pa suspende e decision tuma den e carta cual ta indica cu e relacion di trabou ta termina dia 31 januari 2018. Hues sinembargo a mustra cu e hecho cu Gabinete Mike Eman II prome cu nan a baha a core tuma un decision den Ministerraad y asina perhudica pais Aruba, no ta trece cu ne cu e grupo aki ta nombra como ambtenaar conforme di ley.

SENTENCIA

Consecuentemente Corte a trece padilanti cu nunca a nombra e grupo aki como ambtenaar y a conclui cu nan no ta ambtenaar.