Carlos Mata Figueroa ta bira proximo Consul di Venezuela

ORANJESTAD/ CARACAS – Aruba ta haya un Consul nobo dentro di poco pa representa Venezuela. Carlos José Mata Figueroa (60) ta bira e proximo Consul, reemplazando e Consul anterior Alirio de Jesus Mendoza. Oficialmente no ta conoci kico e ta e motibo di e cambio aki, pero fuentenan a bisa Noticiacla cu ta ‘un decision di presidente Venezolano Nicolas Maduro. Mientras cu Mata Figueroa ta pasa door di e proceso pa keda apunta, e Vice Consul Amabel Lugo Irizarry ta keda encarga cu e consulado, manera tabata e caso caba prome cu Mendoza a keda apunta na 2015. E siman aki por cierto ta netamente 3 aña pasa cu Mendoza a yega Aruba, pa asumi su cargo di Consul General na Aruba pa Venezuela.

CONSUL NOBO

E consul nobo ta un nativo di Isla de Margarita, y a drenta servicio militar na 1975 y a specialisa den artilleria. E la sigui curso di piloto di helicopter, y otro estudio militar na Brasil, y Hulanda. Asina el a bira un di e militarnan miho capacita di e ehercito nacional Bolivariano. Na januari di 2010, Mata Figueroa a asumi e cargo di minister di defensa di Venezuela di e tempo ey presidente Hugo Chavez. Ademas di minister, el a asumi e cargo tambe di gobernador, cual funcion e tabatin te na 2016 pa estado di Nueva Esparta.