Expo Cas a bira e ‘signatura’ di Multi Media international

ORANJESTAD – E cantidad di booth na e evento cu a bira e signature di e compania Multi Media International, esta Expo Cas, no a cambia. Total di 92 booth manera tur aña, solamente mas nobo. Clayton Brown, un di e rumannan morocho na cabes di e evento, tabata contento cu e resultado atrobe. Manera a bira un custumber, e prome di tres anochi, tabata uno di gala, sigui pa dos dia di ‘business as usual’ unda cu na final, por bisa cu 10.000 hende a bishita e expo.

E diferencia di hende ta cu esnan cu a bin pa haya info pa traha nan cas, no ta bin pa algun aña, sino te ora cu mester remodela esaki. Pa ora e hendenan ey, e expo ta mustra nobo atrobe. Asina e ta keda inovativo pa tur cu ta bin. Otro cambio ta e producto cu e comerciantenan cliente ta bin cune. “Mi por bisa sigur sigur cu cada bes tin por lo menos 40% di producto nobo” Brown ta sigui bisa.

E concepto di VIP prome y e otro reparticion, ta un exito cu e rumannan Brown a mantene. E trankilidad cu tin riba e prome anochi, ta pone cu un grupo selecta, ta dispuesto pa paga e 100 florin pa bin, contal cu nan por relaha y mira nan na nan antoho, kico tur tin. Mirando e exito, ta pensando te hasta pa tin un mini VIP diasabra, unda cu ta bay cambia e prijs pa 50 florin riba e di dos dia.

E dia sigur cu ta mas yen, ta diadomingo, ya cu e ta e dia di sosiego pa hopi hende, cu ta pone cu nan ta liber pa bin bishita e expo sin mucho compromiso. Mientras cu e ta un exito rotundo tur aña pa e rumannan Brown, nan sistema ‘biologico’ no ta laga nan slek y bira ‘comfortable’ cu e proyecto. “Nos caracter no ta asina. Nos kier tin 100% bon presenta pa ta miho semper. Nos ta casi micromanage e evento” Brown ta sigui bisa. E grupo basico mes ta apenas 10 hende, pero na tur, tin por menos 40 hende durante e fin di siman di Expo Cas. E unico cos ‘negativo’ cu Brown ta lamenta, ta e problema di parkeer. Si e tabata por a soluciona esaki, e lo a hacie. E lugar no ta importante pasobra e nomber ta di tal forma cu e publico ta sigui. Si tin un lugar cu ta mas apto pa parking, nan lo a hacie. Pero mes momento e la elogia e sitio actual, Renaissance Convention Center, cu su servicio ta uno sigur di gaba.