A pidi CITGO reconsidera decision pa ‘slow down'

ORANJESTAD – Gobierno di Aruba a pidi CITGO Aruba pa reconsidera nan decision di ‘slow down’ nan actividadnan di rehabilitacion di e refineria, y mantene tur trahado na trabou. Ademas a informa cu nan no ta haya permiso pa retira trahado. Asina minister di Labor Glenbert Croes a informa prensa diabierna atardi laat. No ta conoci si CITGO lo acepta y of cumpli cu e peticion di e mandatario.

RECONSIDERACION

Segun Croes, a bisa cu a pidi CITGO ‘respetuosamente pero contundente’ pa mantene e contratistanan na trabou. E mandatario a splica cu e no por kere cu un compania biyonario tabatin 100 miyon pa inverti durante gobierno di AVP, pero no tin aworaki pa continua cu e trabaonan. Segun e mandatario e companianan aki ta ‘campeon pa keha bashi aunke nan ta pata pata di placa’.”Esaki no ta e momento pa keha bashi” Croes a sigui bisa. E compania mester demostra nan buena fe pa cu e trahadornan y tambe gobierno di Aruba den e situacion aki.

RETIRO

Un otro decision cu a core rond e siman aki caba, e mandatario a confirma, cu ta cu a duna orden na departamento di Labor pa no honra ningun peticion pa retiro pa CITGO of otro compania subsidiario. Esey ta evita cu e compania por cuminsa retira e trahadornan sin mas. A mustra cu den pasado a uza e situacion aki di un forma malo y a probecha kitando yen di hende extra. E mandatario a repasa mientrastanto tambe e informacion previo cu e portal aki a raporta ariba, unda cu awe mainta un grupo di contratista a yega na porta di trabou y a compronde cu nan no por a drenta pasobra nan badge a keda cancela. Algo cu no por tampoco. A base di esey, a instrui e departamentonan concerni riba e decision pa no honra ningun peticion di retiro.