Compania Canades ta cera deal cu compania local pa produci marijuana na Aruba

ORANJESTAD – Un compania Canades a cera deal cu compania local pa produci marijuana na Aruba den futuro. Asina prensa mericano incluyendo e portal Caribense NewsAmericasNow ta raporta. E compania, Affinor Growers Ltd a firma un acuerdo di licencia exclusivo cu e compania Vertical Designs Aruba Inc (VDA) pa produci marijuana y cuminda usando e toren vertical rotativo patenta di Affinor Growers. A cambio e comania lo ricibi 10% di propiedad den e compania. A cambio e compania local lo busca tur e toren nan pa su compania pa ta basa na Aruba. Den un reaccion cortico pa NoticiaCla, e CEO di e compania Affinor Growers, esta Nicholas Brusatore a sigura cu e compania na Aruba ta uno nobo y ta existi."Pero nos no por bisa mucho ainda. Noticia mas grandi ta na caminda. Nos ta sorry pero nos ta goberna pa leynan di seguridad na Canada" indicando cu mucho informacion ainda no por duna. 

LEGALIDAD

E compania ta admiti cu marijuana no ta legal na Aruba of otro isla den Caribe, pero e deal ta ‘pendiente cambio di ley’. Awe mainta prome minister Evelyn Wever den un reaccion cortico pa e portal aki, a sigura cu "(marijuana) no ta legalisa ainda y no tin ningun palabracion ainda al respecto". NoticiaCla a averigua cu e compania y enberdad riba nan portal nan ta anuncia e deal aki cu un compania local. Di otro banda, no a logra establece contacto cu e compania local aki ainda pa sa kico realmente ta e intencion di e compania y ken ta su tras, y tampoco a haya registro di Camara di Comercio di e compania. 

POLITICA

Ta conoci cu durante e ultimo campaña electoral, e partido RED Democratico tabata pro pa introduci tanto marijuana medicinal y recreacional na Aruba di un forma legal, argumentando cu tin un mercado grandi financiero cu por beneficia di esaki. Durante debatenan, a logra convence y pone mayoria partido politico bay di acuerdo cu ta pro pa introduci marijuana pa uso medicinal, pero no recreacional. Durante formacion di gobierno, partido RED a bay di acuerdo pa ‘mientrastanto’ laga e idea di marijuana recreacional cay, pero si insisti y haya un compromiso di e otro partidonan di coalicion MEP y POR riba e parti di marijuana medicinal.