Adrian awards a reconoce Aruba riba area di mercadeo y innovacion

ORANJESTAD – E siman aki, e premiacion anual di Hospitality Sales & Marketing Association International (HSMAI) a presenta Aruba Tourism Authority (A.T.A.) y nan agencia ‘The Concept Farm’, cu 11 diferente premio pa innovacion den e mercadeo di viahe durante e di 60 Adrian Awards. E categoria den cual e honornan a wordo nomina ta entre otro Social Media, Mobile Marketing, Virtual Reality y Website User Experience.

Ademas, Aruba a wordo otorga cu un ‘Platinum Award’ pa un asina yama ‘breakthrough’ riba e rednan social cu un iniciativa yama “Happy People Read Sad Tweets” como tambe Aruba a wordo reconoci cu un premio special ‘Libris Pioneer’ pa su ‘Visual Storytelling’ cu e mapa interactivo “360 Map of Happiness.”

Adrian Awards 2017 ta marca e di tres aña consecutivo cu A.T.A. conhuntamente cu ‘The Concept Farm’ ta ricibi e reconocemento Platinum pa su esfuersonan, di cual aña pasa esaki a wordo gana cu e campaña “Local Shortcuts”. Desde 2012, A.T.A. a bay ‘all out’ riba e caminda inovativo digital, cual a laga Aruba gana varios premiacion, entre otro Adrian Awards, multiple Travel Weekly Magellan Awards como tambe e prestigioso Effie Award. Ta bon pa menciona cu Aruba como e destinacion cu a bay cu mas hopi premio ta ser sigui pa e destinacion St. Louis (Merca) cu tawata na di dos luga cu 8 premio. Desde 1956, HSMAI Adrian Awards ta reconociendo pioneronan creativo y logronan den mercadeo.