E informacion pa remedia situacion financiero no ta nobo

ORANJESTAD – E informacion cu gobernantenan a ricibi riba posibilidad pa sali for di e crisis financiero no ta uno nobo. E impresion a wordo crea den medionan local dialuna anochi, cu ta awo gobernador lo a core manda un carta pa ‘drecha’ e relacion cu ‘lo ta daña’ entre e instituto y gobierno di Aruba. Gobernantenan a ricibi esaki no awo, pero te hasta prome cu e crisis a cuminsa. Prome te hasta cu minister Juan David Yrausquin a entrega su retiro.

Mientras cu NoticiaCla tin e fecha cu e informacion aki a wordo manda, lo confirma solamente awor cu gobierno for di mas di siman pasa, a ricibi e informacion  unda cu e ta informa di e posibilidad pa pidi parlamento pa presta placa. Esaki den forma di ‘bono’, y cu unabes parlamento aproba esaki, e no tin problema pa gobernador firma e carta aki mesora. Esey lo facilita gobierno cu su responsabilidadnan financiero, sin cu e (gobierno)  ta haya su mes den problema, aunke cu presupuesto no ta aproba ainda. Otro forma, gobierno no por fia placa, cu tur su consecuencianan cu esaki por tin.

For di dialuna anochi, informacion a cuminsa circula den varios media, informando cu gobernador a ‘cambia di tono’ y e muestra di esaki ta e carta repentino cu e la manda ayera, pa ‘drecha e asunto’. Gobernantenan no tabata disponibel pa confirma ni desmenti si nan a ricibi e mensahe di gobernador dialuna of prome, manera informacion confirma cu NoticiaCla tin.