Habitantenan di Wayaca/Primavera ta pidi auxilio pa ‘cruzada peligroso’

ORANJESTAD – Habitantenan di Wayaca/Primavera a cuminsa pidi auxilio pa e cantidad di accidente di auto cu ta tumando lugar na e ‘skina peligroso’ na Wayaca. Den menos cu un siman tabatin dos accidente atrobe, y algun tempo atras tabatin algun mas serio unda cu te hasta muraya di cas a wordo kibra, y cu auto a bolter. E mesun skina aki ta ‘conoci’ pa e accidente fatal cu a tuma lugar algun aña atras ora cu un dama stranhero a perde su bida.

GREEN CORRIDOR

Pa hopi aña, e skina aki tabata uno hopi peligroso pasobra no tabatin ningun tipo di borchi ni nada, cu tabata pone hopi automobilista den duda. Aunke cu regla di trafico ta bisa semper cu si no tin borchi na un cruzada, e trafico di drechi tin preferencia. Ora cu a cuminsa traha riba Green Corridor, a cambia cierto caminda y mester a desvia trafico pa usa e.o. e cruzada aki. Ta e ora numa a dicidi pa marca e tereno y mustra cu borchi y riba caminda cu flecha, ken tin rason. Pero awor ta parse cu ni asina esey no ta yuda y ta cuestion di tempo prome cu un accidente fatal bolbe sosode. E habitantenan a pidi pa por lo menos pone algun sleeping polis eybanda pa forza automobilistanan pa slow down y evita desgracia na e famoso ‘cruzada peligroso’ di Wayaca/Primavera.