Premier Wever na gremionan: Papia ‘toontje lager’

ORANJESTAD – Minister presidente Evelyn Wever Croes diahuebs mainta a aclaria e asunto di salario minimo, despues cu e declaracion di colega minister di Labor Glenbert Croes riba aumento ‘substancial’ di salario minimo a causa un ‘warwaru’ di reaccion dialuna. E mandatario a admiti cu e no a tende e declaracion completo di Croes, pero cu cualkier aumento lo bay man den man cu otro cambionan. Entre otro mester pensa cu di un banda ta subi e salario minimo pero ta ahusta e impuesto di un forma positivo pa comercio.

TONO

Pero den mesun rosea, Wever a manda un mensahe pa gremionan comercial y tur otro cu a critica e idea, pa nan papia ‘un toontje lager’, esta baha nan tono di reclamo. “Ban ta serio, unda boso tabata 8 aña largo?” Wever a puntra, indicando cu a keda keto tur e tempo, y no a bisa nada. “Mi ta contento si cu tur hende a lanta for di soño” Wever a sigui bisa. E ta admiti cu e forma di Croes pa presenta e plan tabata hopi emocional, pero cu asina e ta y no por kita esey di e mandatario. Wever tampoco tabatin detayes referente e aumento di salario minimo, manera ki tempo y cuanto.

TEMPO

Loke si a bisa ta cu ta claro cu no por introduci esaki con cu ta, mei mei di aña, pues cu esaki mester sosode cambio di aña. Tambe a confirma cu a institui un comision di tripartite cu tin cu atende e asunto. Lo investiga e caso manera mester ta, pidi debido conseho na instancianan manera SER etc. Pero tabata cla cu Wever ta sostene e declaracion di Croes.