Simar: Decision final independisacion DPS den man di miembronan

ORANJESTAD - Directiva di SIMAR a tuma nota di varios comentario y comunicado relaciona cu e topico di independisacion di scolnan publico. Segun e sindicato di maestro,ta di lamenta cu hopi informacion eroneo a ser publica cu no ta cuadra cu e berdad.

Pa loke ta e tema aki, directiva di SIMAR, hunto cu representantenan di SEPPA a reuni cu minister Lampe na dos ocacion. E prome reunion tabata pa minister duna informacion tocante su vision, despues cu su persona a lansa e idea publicamente via Facebook y den medionan di comunicacion. Ambos sindicato a haci varios pregunta y a trece nan preocupacion nan dilanti.

Minister Lampe a duna un presentacion na comision di enseñansa di Parlamento y na director- y cabesantenan di scolnan publico. SIMAR a haci un apelacion na minister pa duna e presentacion aki na SIMAR y SEPPA. Esaki a tuma lugar diamars ultimo na bestuurskantoor. Minister Lampe a haci e peticion na directiva di SIMAR pa por ta presente na e reunion extraordinario yama cu miembronan pa duna e presentacion. Directiva, mirando tur e incertidumbre cu tabata reina bou di su miembronan, a acepta e proposicion aki.

Sr. Veekmans, director suplente di DPS, alaves hurista di enseñansa, a duna e presentacion y a splica amplio tocante e vision di minister Lampe pa loke ta independisacion di DPS. Miembronan presente a haya oportunidad pa haci pregunta y trece nan dudanan dilanti.

Sr. Veekmans y minister Lampe na nan turno a contesta tur pregunta riba e topico.

Despues di e presentacion minister y su delegacion a retira y directiva a culmina e reunion cu e peticion pa cada un di su miembronan repasa e presentacion ricibi, cual ta riba www.ea.aw, pendiente di e siguiente reunionnan. SIMAR lo sigui den dialogo cu minister Lampe pa cu e tema aki, ya cu e lo mester presenta documentacion concreto pa cu e cambionan proponi. Entre otro e statutonan, cambionan den ley y hirargia di e fundacion menciona.

Directiva lo sigui e desaroyo di cerca y hunto cu SEPPA lo keda dialoga y negosha cu minister. Tambe SIMAR kier aclarea cu ainda no ta asina leu pa forma un opinion y/o punto di bista concreto pa loke ta e topico. Directiva di SIMAR ta consisti di 5 miembro (no di un persona) y no ta dicidi riba su mes. Un decision final ta den man di miembronan di SIMAR, segun e comunicado ta finalisa bisando.