Parlamentario di St Maarten ta bay prison pa fraude electoral

PHILLIPSBURG – Parlamentario Silvio Matser (51) di St Maarten a keda sentencia na 8 luna di prison (2 condicional) pa fraude electoral. Hunto cu ne 2 otro persona tambe a tende sentencia di prison den nan contra den e casonan combina di "Octopus" y "Grastelchi". Matser tabata sospecha di a cumpra voto pa gana eleccion di 29 di augustus 2014 di St Maarten. Hunto cu ne ex director di prison E.R. tambe a haya castigo di prison, 160 dia di cual 80 ta condicional. Loke a ‘scapa’ Matser ta cu a aplica e ley electoral bieu, compara cu e ley nobo di 2015, cu lo a nifica cu Matser mester a sinta 2 aña en bes di 8 luna.

OPERACION

E operacion dia di eleccion tabata cu e director di prison tabata facilita e Parlamentario Matser cu e lista di e votadornan valido di prison, y Matser na su turno tabata paga cada prisonero riba e lista, 100 dollar pa a vota p'e. Un di tres persona tambe a cay cera, pa a yuda coopera cu suministracion di e placa. Corte a condena e acto, indicando cu a opta pa influencia e votadornan pa vota pa esun cu paga mas, en bes di vota pa esun cu ta miho cualifica. Asina e ta daña e reputacion di e sistema democratico di St Maarten. Mientras cu 3 persona a keda sentencia, e caso total ta envolvi 21 sospechoso; 3 ta sentencia y falta 6 pa haya un sentencia, mientras cu 9 nan caso ta para, 2 a keda asesina mientras 1 ta ‘perdi’. Fuente OM Curacao. Potret cortesia www.todaysxm.com.