KVK: Gobierno baha bo gasto prome cu aumenta salario minimo

ORANJESTAD – Prome cu gobierno kier pensa di aumenta salario minimo, e mester pone baha su gastonan prome. Esey ta e prome reaccion di presidente di Camara di Comercio Ernst Mohamed riba e anuncio di minister di Labor Glenbert Croes cu kier aumenta salario minimo, considerablemente. Segun Mohamed, no ta cuestion cu no kier aumenta salario minimo, pasobra e tambe ta kere cu tur hende merece un miho calidad di bida. Pero mester tin un poder di compra bon. Pero Camara di Comercio kier pa e minister contesta algun pregunta prome, cu tuma e paso menciona. Entre nan, ki dia kier introduci e cambio, cu cuanto e cambio mester ta, y si a investiga e impacto di e cambio aki.

NEGOSHI

Segun Mohamed ,gobierno mester opera gobierno manera un negoshi, y structura esaki di tal forma cu e operacion ta bira mas rendable prome cu por haci e cambionan desea. Asina Mohamed a sigui bisa. Gastonan manera transporte, awa y coriente, invoerrechten y otro tipo di gastonan asina cu ta den man di gobierno, mester wordo atendi prome. Tambe mester baha e cantidad di trahado cu gobierno tin. E hecho cu gobierno a anuncia reduccion di 8 miyon den gasto y personal, ta zona bunita pero ta apenas un gota riba e planchi cayente, si tene na cuenta cu e gastonan ta riba 1 biyon florin. Pues berdad cu e por ta un comienzo pero e no ta echt algo grandi. No ta bisa cu mester retira tur hende, pero sigur mester haci e aparato gubernamental hopi mas chikito.