Awe gobierno ta informa gobernador di cambionan pa presupuesto 2014

ORANJESTAD – Mientras cu e no a bisa esey den palabranan exacto, minister di finanza Angel Bermudez a duna ‘indicacion’ diahuebs cu gobierno di Aruba ta preparando y/of ta dispuesto pa entrega un presupuesto modifica proximamente, basa riba e recomendacionnan di e secretariado di College Financieel Toezicht. Cu esey, gobierno ta cumpli cu e articulo 3 di e Aanwijzing (KB) di 11 di july ultimo.

Gobierno (lesa minister di finanzas Angel Bermudez) tabatin te diabierna pa por escrito informa gobernador di Aruba cu e dispuesto pa bin cu un propuesta nobo di e ley di presupuesto di aña 2014, y/of trece un adaptacion/cambio den esaki (lesa e fragmento aki di e KB). Si gobierno no a cumpli cu esaki , gobernador no ta mara mas na e aanwijzing pa wanta e presupuesto, y por tuma paso cu e ta rekeri necesario. Mientrastanto e plan ta pa mas tarda otro siman diabierna, 3 di october, gobierno entrega e presupuesto modifica, cu e cambionan proponi segun e aanwijzing.