Grupo di 7: No na reunion, si na demandanan

ORANJESTAD – E conocido ‘Grupo di 7’ y gobierno no a topa otro e siman aki. Gobierno a invita, pero e grupo a rechasa. Por lo menos esey ta e informacion cu NoticiaCla.com tin for di e carta cu e grupo a entrega 2 dia prome cu e reunion. Gobierno di su banda ta sigura cu nan no tabata sa di e carta y a warda trankilo riba e grupo. Despues di mei ora, e ministernan cu a presenta pa e reunion, lo a bandona esaki.

Den e carta cu e grupo a entrega diamars ( mira e copia di e carta aki), nan ta mustra cu nan ta rechasa e invitacion pasobra nan ‘no tin nada mas pa dialoga cu minister presidente y cu no tin confiansa den e gobernantenan di gabinete Mike Eman II. Nan a bisa cu nan kier simplemente pa gobierno duna oido na nan peticion y a entrega un lista di demanda cu ta bisa exactamente kico tur nan kier pa gobierno haci (lesa e carta aki).

Loke tambe e grupo a sigura, ta cu nan lo ta presente na e proximo manifestacion cu ta diaranson awor di un otro grupo. E grupo ey, lo tene un manifestacion cu e meta pa demanda pa para aumento di tarifa di coriente y otro tarifanan cu tin pensa di subi. Mirando cu e grupo di 7 ta identifica nan mes cu e metanan aki, nan lo sostene e grupo diaranson awor.