Thijsen: Pais Aruba ta apela sentencia contra periodista

ORANJESTAD – Pais Aruba/Parlamento ta bay apela e sentencia contra dje di algun siman atras cu nan a perde contra periodista Nelson “Speed” Andrade. Asina presidente di Parlamento Ady Thijsen a confirma pa NoticiaCla awe mainta. “Nos no ta acuerdo cu e sentencia!” Thijsen a bisa e portal aki. E sentencia cu Thijsen ta referi na dje ta di dia 20 di december 2017 ora cu huez a ordena pais Aruba duna e periodista e entrada bek na Parlamento, contal cu e no causa disturbio. Algo cu Parlamento a prohibi Andrade pa un periodo di 3 luna. Thijsen awor ta apela esaki.

E CASO

E caso ta origina ora cu Thijsen a manda e periodista un carta dia 8 di december 2017 indicando e cu e ta wordo prohibi entrada pa 3 luna di tempo na Parlamento, pasobra e no a cumpli cu regla di cas di Parlamento y cu el a reacciona di un forma bruto y sin respect riba un carta di e presidente. E periodista a entama un caso dia 14 di december 2017 contra e decision aki y pa pidi huez revoca e decision aki. Corte a trata e caso dia 19 di december 2018, y un dia despues caba (inusual) a dicta sentencia contra pais Aruba. Segun e huez, Thijsen a tuma un decision basa riba un autoridad cu e no tin. Thijsen no a gusta e sentencia y awor oficialmente a informa cu pais Aruba ta apela e sentencia. No tin fecha pa e caso aki tuma lugar.

OTRO ABOGADO 

E diferencia tambe ta cu e biaha aki pais Aruba ta usa otro abogado, den e caso aki Gabri de Hoogd. Segun Thijsen abogado Gabri de Hoogd mester a hasi e caso prome biaha caba, prome biaha caba pero e no tabata na Aruba. Como tal abogado Nancy Gravenstein a haci esaki biaha pasa.  Lesa e sentencia di e caso ey AKI. Potret archivo di NoticiaCla dia di sentencia na december 2017.