Delegacion CITGO na caminda pa Aruba pa duna informacion

ORANJESTAD – Tin un delegacion di CITGO di Merca na caminda pa Aruba pa papia cu e.o. Gobierno di Aruba proximamente. Mientras cu no a duna un fecha exacto pa e bishita tuma lugar, prome minister Evelyn Wever Croes a confirma e informacion di e bishita e siman aki. E bishita tin cu duna hopi claridad riba e situacion actual di e refineria. Segun Wever, gobierno ta ocupa cu dos trayecto riba e situacion di CITGO. Entre nan via un comision huridico a keda institui pa analisa e aspecto legal pa conseha gobierno su opcionnan pa cu e deal. E otro trayecto ta e adquisicion di e informacion necesario cu ainda falta manera kico ta e compromiso y inversionnan cu CITGO tin pensa di haci y lo a priminti.

PRESUPUESTO

E mandatario a mustra un biaha mas tambe cu nan ta keda hopi realistico pa loke ta e posibilidadnan di e refineria, esta cu nan no ta keda confia y spera riba e reapertura. Como tal nan a dicidi (manera cu e portal aki a raporta caba) cu den presupuesto 2018 nan no a pone nada di e refineria, esta inclui e entradanan di e refineria.” Si e refineria habri, e ta un meevaller” Wever Croes a sigui bisa. Si inclui e refineria su apertura, y e no a habri, e presupuesto lo tabata irrealistico y lo mester a reahusta esaki cada bez.

COMPRA

Un punto interesante menciona, ta cu segun gobierno, nan ta wordo acerca tur siman pa hende cu kier tuma e refineria over. “ Pero nos ta sintando cu ningun hende (awor) pasobra tin un contract cu CITGO” Wever Croes a bisa. Ta Unabez cu tin un contesta di e teamnan tecnico y financiero di con mester lesa y interpreta e acuerdonan cu tin, lo tuma cierto decisionnan, y no ta descarta e ora cu por tin otro personanan interesa.

PLACA

Durante e bishita di e delegacion, lo haya informacion tambe con a para cu e pagonan cu falta, y pakico e pagonan no a wordo haci ainda. Manera por corda, gobierno a confirma cu den 2017 no a haci pago corespondiente y tambe falta e otro tipo di pagonan di e.o. FMSA (fuels). Den un pasado recien, director di Refineria di Aruba esta Alvin Koolman a bisa e portal aki cu e detencion di top di CITGO aña pasa a frena e banconan di duna prestamo pa por financia loke falta pa paga ainda. No ta conoci con a para cu esey y si ainda banconan ta pensa mescos. Tur esaki lo mester wordo contesta tambe durante e bishita di CITGO cu ta na caminda.