Polis investigando caso di baby cu a bira malo na crèche na Catiri

CATIRI – Polis ta investigando un caso di un melding di un baby cu a bira hopi malo y cu inicialmente a kere cu el a fayece. Vocero suplente di polis Liliana Rasmijn a confirma cu polis a haya melding pa 2:15 pm di un caso di baby cu no ta duna señal di bida na un crèche na Catiri 12-H. Mesora polisnan a acudi y a pidi asistencia di ambulance cu a transporta e criatura mesora pa hospital. "E baby su situacion ta critico" Rasmijn a declara pa prensa un rato pasa. E señora di edad cu ta wak pa e baby (e tin un crèche pa hopi aña), a bira malo y mester a haya asistencia medico tambe. Segun Rasmijn, no ta conoci kico exactamente por a pasa, pero tabatin presencia di hopi autoridad pa cuminsa cu nan investigacion pa resolve e caso aki. Mientrastanto ta sperando un update di e situacion di e baby cu ta na hospital.