Maduro: CAFT a ricibi e memorandum financiero di gobierno na tempo

ORANJESTAD – Gobierno a entrega e plan financiero diabierna na e colegio di supervision financiero di Aruba CAFT. Minister di finanza Xiomara Maduro a sigura NoticiaCla esaki diasabra. “Si, e rapport a wordo manda ayera tardi” Maduro a bisa, aunke cu e no ta cla pa divulga e contenido ainda. E la sigura e portal aki cu gobierno asina a cumpli cu e ultimatum di CAFT di diabierna merdia/atardi. “Si, nos a cumpli na tempo y a haya confirmacion di e secretariado di CFT cu nan a recibi e documento” Maduro a bisa. CAFT mas prome a bay di acuerdo riba peticion di gobierno pa duna nan un dia mas (envez di diahuebs) pa entrega e plan.

FEM

E Financieel Economisch Memorandum (FEM) ,-cu ta e nomber oficialmente di e plan entrega diabierna-, mester splica riba con gobierno tin pensa di cumpli cu e contenido di e presupuesto 2018. Principalmente con tin pensa di reduci e deficit actual, y cumpli (mas hopi cu por) cu e normanan stipula pa e ley di LAFT. E partido na mando a haya (den pasado) e apodo di 'e partido di medida', y como tal nan ta haciendo tur posibel pa no tin cu bay den e direccion aki awor. Di otro banda, prome minister Wever e siman aki a duna indicacion cu manera cos ta, si no haci nada, e entradanan cu gobierno ta poni pa ricibi, no ta suficiente pa cubri e pagonan cu tin cu haci pa e.o. e proyectonan PPP. Pues posiblemente mester bay den direccion di haci cierto cambio, pa logra aumenta e entrada di caha di gobierno. Algo cu CAFT a indica tambe, esta cu e unico forma pa saca Aruba di e problema serio, ta pa bin cu medidanan adicional. Incumplimento pa logra e norma stipula di deficit, por nifica un conseho negativo di CAFT, cu consecuencia cu nos isla por ricibi un 'instruccion' of e asina yama 'aanwijzing'. Y ta basa riba e memorandum entrega diabierna, cu CAFT lo dicidi kico e siguiente paso ta. Informacion di fuentenan financiero Hulandes ta indica cu tabatin miedo cu si gobierno no entrega e plan na tempo, cu esey lo tabata suficiente motibo pa CAFT toch dicidi pa conseha Rijks Ministerraad pa duna Aruba un ‘instruccion’ of un aanwijzing, aunke a duna gobierno siguransa mas prome cu lo no haya esaki. Mientras cu e contenido no ta conoci, ta spera cu CAFT (cu si tin e memorandum awor) keda convenci cu e loke cu gobierno a presenta, den sentido cu e ta suficientemente realistico cu nan por acepta esaki y cu CAFT no mester tuma otro paso. Den un combersacion recien cu e portal aki, presidente di CAFT Raymond Gradus a sigura e portal aki cu tur cos ta depende di e plan aki, pa wak con gobierno ta logra saca su curpa di e buraco financiero aki.

CONSEHO

E conseho cu gobierno tin cu haya awor di CAFT, segun Maduro a informa e portal aki diasabra, ta di e concepto di presupuesto 2018 cu mester drenta dia 23 februari. “ Pa e dia ey mi no sa si nan lo duna nan opinion caba ( riba e memorandum )” Maduro a sigui bisa. E mandatario mientrastanto a sigura e portal aki cu e mes lo bay amplia riba tanto e situacion financiero, pero mas importante ainda, e FEM mas den curso di otro siman.