Minister: Dos compania na Sero Cristal berdad ta traha sin permiso

ORANJESTAD – Enberdad tin dos compania cu ta eherciendo trabou na Sero Cristal sin cu nan tin permiso pa haci tal. Minister di infrastructura Otmar Oduber den un reaccion corto pa NoticiaCla a confirma cu a manda un carta pa minister di husticia Andin Bikker, ‘mustrando riba e hecho cu niun di dos compania tin un ‘hindervergunning’. Esaki ta cuadra cu e keho cu e fundacion cu a lanta pa proteha interes di esnan den e area, a pone den un carta siman pasa ainda. Nan a duna gobierno 14 dia pa cana e caminda corecto legal pa atende e problemanan, sino por spera medida legal. Pa loke ta su responsabilidad mes, e mandatario responsabel pa infrastructura a sigura e portal aki cu e la haci su trabou. “Nos a haci di nos banda tur locual ta regarda nos ministerio”, e mandatario a sigura e portal aki, pero no a bisa kico tur a wordo haci.

ULTIMATUM

Tabata e siman aki ainda cu e portal aki a raporta riba e keho di e Fundacion Conserva Area Cristal. Aki e fundacion a bisa cu si en caso cu gobierno y otro instancianan concerni no efectua controlnan adecua na e Area Cristal, y ehecuta ley estricto manera mester ta, e fundacion un biaha mas lo evalua pa demanda gobierno legalmente. Asina e comunicado di e fundacion ta bisa, cu e titulo ‘Ta bira tempo pa accion’. Segun e fundacion a bisa den e comunicado al respecto, cu por corda ainda ora cu gobierno nobo a sinta, cu e minister encarga cu infrastructura Otmar Oduber a tuma accion y anuncia esaki publicamente.