Warda Costa ta intensiva presencia debi na situacion cu Venezuela

ORANJESTAD /WILLEMSTAD – E situacion actual di Venezuela a pone cu Warda Costa di Caribe ta bay ta mas activo cu su papel di ta polis maritimo den e region. Asina vocero di Warda Costa Roderick Gouverneur a confirma pa NoticiaCla. Segun Gouverneur, e parti di intensiva e control, ta den nan ‘jaarplan pa 2018’ di 40 pagina. Aki tin un montante di placa extra cu Hulanda a reserva pa yuda. Esaki ta encera cu pronto lo tin mas patruya vigilando e awanan teritorial pa asina controla posibel traficacion di hende y boto entre Venezuela y islanan ABC.

PRESUPUESTO

Warda Costa a confirma cu gobierno Hulandes recientemente, manera cu NoticiaCla a raporta anteriormente caba, basa riba e situacion di Venezuela a aumenta pues e presupuesto di Warda Costa di Caribe pa por ta mas presente visiblemente. E plan cu Gouverneur ta menciona, ta papia tambe di cu debi na e cantidad di incidente relaciona directamente cu Venezuela, cu a tabata necesario pa ‘reforza’ e frontera den Caribe. “E inestabilidad den varios area di crisis na mundo ta pone cu e problemanan ta plama pa otro partinan di mundo. Un aumento di incidente relata na e.o. teror y problema di ilegalidad tambe ta forza Reino Hulandes den Caribe pa fortifica e fronteranan y asina minimalisa e risiconan relevante’, e rapport ta sigui bisa. Por lesa e rapport completo AKI. Potretnan cortesia di Warda Costa Caribe.