Van Dam: Ta parse cu asesinato di de Vuyst ta resolvi

ORANJESTAD – Ta parse cu e asesinato aki ta resolvi. Asina ta parse por lo menos. Asina Procurador General Alexander van Dam a bisa den un conferencia awe mainta riba detencion den e caso Fist (asesinato na de Vuyst). Loke a conduci na e detencion di e homber Jairo.A.C (46), ta e hecho cu su DNA a ‘match’ cu e DNA haya na e lugar di e crimen na e cas di e victima di de Vuyst. Van Dam riba pregunta di NoticiaCla, ta considera J.A.C. como e sospechoso principal, y cu e caso ta resolvi aunke cu ‘nunca no ta para e posibilidad pa mas detencion’. Alto comisario di polis Dolfi Richardson, contestando pregunta di e portal aki, enberdad ta considera e crimen aki uno di esunnan mas serio conoci na Aruba te awor.  

MATCH

Tabata ayera cu cuerpo policial di Aruba (KPA) a haya e resultado di e investigacion di DNA for di Nederlands Forensisch Instituut (NFI) cu a confirma e ‘match’ menciona entre e sospechoso y e DNA na e sitio. Van Dam ta compronde e frustracion di famia y conocirnan pa e tardanza (3 luna) pero a sigura cu nan mester a traha cuidadosamente pa no haci fayo, y pa bay detene un persona cu no mester ta deteni.

DOOFPOT

E proceso di manda prueba Hulanda ta tarda y esey enberdad por a frustra hopi hende, keriendo cu a pone e investigacion den un ‘doofpot’. Pero ayera ora cu e pruebanan a yega, y a mustra contundente, a pasa mesora pa detencion di e persona ayera.

PRESION

Contrario na e pensamento den comunidad, van Dam a sigura cu ningun momento a para e investigacion aunke cu informacion contrario tabata circula riba rednan social. Loke a tarda ta e resultado di e DNA cu e ekipo grandi di investigacion T.G.O a manda pa Hulanda pa investiga. Ta pruebanan cu nan a haya na e sitio di e crimen, cu nan a match cu personanan di interes cu a bin na conocemento di KPA danki na declaracion di testigonan. Y segun van Dam, e nomber di J.A.C. tabata ripiti.

CARGONAN

Mientras cu e persona ta deteni, awor lo confronte cu e resultado logra di e investigacion y pa cual e tin cu responsabiliza su mes awor. Basa riba e confesion y interogacion, por determina e envolvimento di e persona, y tambe ki cargo ta mara na e persona aki. E lo keda presenta e siman aki mes dilanti huez comisario y eventualmente traslada pa KIA. Pa loke ta e nivel di seguridad y tratamento di detenido, no por a bisa mucho segun Van Dam. Tin cu traha un analisis di e situacion y ey determina con lo anda cu e persona aki, y con exactamente lo cere na KIA y eventual otro caminda.