Cantidad vak pa examen ta stroba balor igual diploma Aruba

ORANJESTAD – “Den e protocol no ta estableci cu studiantenan di Aruba por haci nan examen final cu menos vakken compara cu Hulanda, pa toch, mescos cu Hulanda, haya un diploma di mesun nivel “. Na palabra e vocero di e ministerio di Hulanda riba enseñansa, cultura y ciencia (OCW) esta Michiel Hendrikx na e vespertino Amigoe, diahuebs atardi. E ta referi na e protocol di enseñansa, firma na 2012 entre Aruba y Hulanda. Manera cu NoticiaCla.com a raporta tambe, den e protocol ey, ta poni cu studiantenan di Aruba na 2016 (pa Havo) y 2017( pa Vwo) ta haya exigencianan hulandes mas dificil, y cu nan mester tin mesun cantidad di vak pa nan diploma manera cu studiantenan hulandes cu pasa examen.

“Si esey no sosode, nan diploma no tin mesun balor cu esun di Hulanda, cu e consecuencia cu scolnan avansa y universidad na Hulanda por impone mas exigencia, prome cu nan permiti studiantenan di Aruba” Hendrikx ta sigui bisa. Di otro banda, minister di enseñansa di Aruba, Michelle Hooyboer Winklaar ta positivo cu Hulanda lo por bin pospone e condicionnan menciona. Esey e mandatario ta contesta e vespertino Amigoe.

Normanan mas exigente di examen por wordo introduci relativamente facil. E problema ta bin ora cu mester aumenta e cantidad di vaknan pa haci examen. E ta un problema si tene na cuenta actualmente studiantenan di havo ta haci examen den 6 vak, mientras cu esnan di VWO ta haci examen den 7 vak. Studiantenan di Aruba tin un vak menos cu esun di Hulanda. Y pa esnan cu ta haci examen escolar e aña escolar actual, no tin problema pasobra e nivel di diploma ainda ta garantisa. Ta esnan cu actualmente ta den 4e klas, ta esnan cu ta wordo confronta cu e cambio aki. Algun a scohe un materia (vak) extra caba a base voluntario. Pero esaki ta 48% di e totalidad (havo) y 86% pa vwo. Y e ta un porcentahe cu normalmente ta baha pa ora cu nan haya e prome rapport.

“Cu un pakete di vak mas chikito, e chens pa wordo admiti na enseñansa avansa ta bira mas dificil despues”. Esaki e vocero di OCW, Hendrikx ta sigui bisa Amigoe. “E cantidad di vak ta un indicador importante, pa midi si tin suficiente ‘igualdad’ entre e diploma di Aruba y e ekivalente di Hulanda”.

Mientras cu tur esaki ta hopi cla pa Hulanda, na Aruba ainda Directie Onderwijs ta den consulta cu e ministerio hulandes (OCW) riba un parti di e exigencia nobo nan. Minister di enseñansa Winklaar a splica Amigoe, cu Aruba a entrega un proposicion riba un implementacion den fase, basa riba e contenido di e protocol entre Aruba y Hulanda. “E prome fase a cuminsa den e aña escolar 2014/15 caba cu e adaptacion di varios di e normanan. E proximo fase ta e adaptacion di e pakete di materia (vak) “ Hooyboer a bisa. E ultimo fase, segun e minister, a cuminsa na april ultimo.

Mientrastanto cu na juni, Aruba a sugeri na OCW pa laga e studiantenan di VWO tuma un materia extra den forma di un idioma, y un extra materia pa havo y vwo entrante e aña escolar 2015/16. “Porta nos no mester basa nos mes riba e cantidad di materia, sino riba e profundidad di e materia” e mandatario a sigui bisa. E mandatario ta sigura cu tabatin consulta cu e stakeholders nan. E stakeholder mas importante, esta Colegio Arubano, sinembargo ta keha cu no tin suficiente informacion riba e topico aki. Segun e mandatario, OCW a reacciona positivo riba e proposicion menciona. Y den e proximo lunanan mester bin un claridad riba e asunto. “Mester ta un punto central cu ningun studiante mester sinti e efecto negativo di esaki”. “Esey no ta solamente un compromiso di Aruba pero di henter Reino” e mandatario a sigura.

Na Hulanda, e admision pa enseñansa avansa ta un asunto netamente di universidad y otro scolnan avansa. OCW no tin influencia riba esey. E admision ta sosode si basa riba direccion y maneho di e ministerio. E momento aki, e maneho ta indica cu e diploma di Aruba ta ekivalente. Toch e ta laga espacio pa nenga studiantenan cu kier tuma curso pa aumenta nan cantidad di materia, ora cu por ta tin un retraso den nivel di idioma como materia, of un pakete di materia cu no ta cuadra bon cu e estudio cu e studiante ta sigui. Ta aki ta unda cu un pakete mas chikito ta duna un curso extra un posibilidad pa drecha e posibilidad pa exigencia di admision of e rechaso di studiantenan arubiano cu a caba scol na Aruba.

Na Hulanda, a introduci normanan di examen mas halto na 2012 y 2013. Entre otro cu ningun punto (cijfer) riba e examen central final, por ta mas abou cu un 5.5. Riba dje, pa e materianan principal manera wiskunde, nederlands, y engels, por tin solamente un vijf (5) como un punto (cijfer) final. E cantidad di materia valido pa e examen final pa havo ta poni na 7(shete) y esun pa vwo na 8 (ocho). A base di e protocol entre Aruba y Hulanda, studiantenan di tanto Aruba como otro partinan di Caribe Hulandes, mester cumpli cu e normanan aki. Solamente di e manera ey por sigura cu e igualdad di e diploma di Aruba ta salvaguardia. Si e combersacionnan cu OCW no duna un resultado positivo, esey ta nifica pues cu alumnonan cu ta den ‘vierde’ klas y no ta siguiendo un materia extra, nan lo no por haya un diploma cu ta riba nivel di Hulanda, y como tal, no tin balor necesario. Nota: NoticiaCla.com a reproduci e articulo cu permiso di e vespertino Amigoe.