Gobierno tin te diabierna pa entrega rapport financiero

ORANJESTAD – Gabinete Wever Croes tin te diabierna pa entrega e rapport financiero cu ta splica con e tin pensa di reduci e deficit di 6% te na un posibel 2%. Si no haci esaki, e colegio di supervision financiero di Aruba (CAFT) por recomenda un ‘aanwijzing’ pa nos isla. CAFT a confirma pa NoticiaCla awe mainta cu nan no a ricibi e plan financiero ainda. “Aruba a pidi pa pospone (e entregamento di e rapport financiero) te diabierna merdia. CAFT a bay di acuerdo cu esey". Mientrastanto awe mainta minister di Finanza Xiomara Maduro a confirma esaki pa e portal aki cu enberdad gobierno no a haci entrega ainda. “Ainda no!” Maduro a contesta e portal aki.

PALABRACION

Dos siman pasa den un combersacion cu NoticiaCla, e presidente di CAFT a bisa cu ta duna Aruba 2 siman pa entrega e rapport ey, cu inicialmente mester tabata diahuebs. Ora cu e portal aki a puntra prome minister Wever awe mainta, con ta para cu e rapport, Wever a contesta “Nos a palabra dentro di dos siman. E siman aki e ta bay wordo entrega!” aunke no a bisa un fecha exacto.

SITUACION FINANCIERO

Manera ta conoci, Aruba su situacion financiero no ta bon y awor sigur no, mirando cu segun tanto CAFt como gobierno, no ta bay yega na e norma di 0.5% segun ley di LAft. Aworaki e ta te na 6% y ta premira cu kier baha esaki por lo menos te na 2%. Mientras cu e presupuesto a keda entrega na CAFT algun siman atras, CAFT mester di e rapport financiero pa wak con exactamente gobierno kier logra e presupuesto aki. Y ta basa riba e plan ey, si ta realista of no, cu CAFT ta tuma su decision si Aruba ta libra di un aanwijzing (instruccion) of no. “Tur cos ta depende di e rapport aki” Raymond Gradus a sigura e portal aki durante nan ultimo bishita.

RESISTENCIA

E portal aki a compronde tambe cu si gobierno no bin cu pasonan structural pa drecha Aruba su finanzas publico, por spera cu esey lo haya gran resistencia di tur partners cu ta conseha y controla gobierno. Ta na e gobierno aki pa laga wak con serio nan ta cu restructuracion financiero pa trece e cambio necesario ariba termino mediano y largo.