Fundacion Conserva Area Cristal cu otro ultimatum pa gobierno

ORANJESTAD – Den caso cu gobierno y otro instancianan concerni no efectua controlnan adecua na e Area Cristal, y ehecuta ley estricto manera mester ta, Fundacion Conserva Area Cristal un biaha mas lo evalua pa demanda gobierno legalmente. Asina e comunicado di e fundacion ta bisa, cu e titulo ‘Ta bira tempo pa accion’. Por corda ainda ora cu gobierno nobo a sinta, cu e minister encarga cu infrastructura Otmar Oduber a tuma accion y anuncia esaki publicamente. No ta conoci kico por a bay robez y si e loke a priminti e biaha ey, no a tuma lugar toch, te pa e stichting pone otro ultimatum.

HINDERVERGUNNING

Segun e fundacion, den e di dos mitar di december 2017, dos compania a pidi un asina yama hindervergunning pa nan actividad na Budiu. A registra mas di 300 keho (bezwaar) , pa tanto ciudadanonan, miembronan di e fundacion y algun otro ciudadano cu ta sostene e fundacion. E fundacion ta sigura cu nan a haya prueba cu e departamentonan a haya esaki pero no a haya reaccion di e respectivo autoridadnan. Tambe e fundacion ta mustra cu e minister responsabel lo tin cu tuma un decision dentro di un termino legal di un luna. Mientrastanto tin e actividad minero cu ta activo na Sero Plat, Babijn, Jaburibari cu tambe a pidi un hindervergunning pero no pa continua cu e cobamento di santo, sino pa produccion di beton/asfalt. Un aviso den un matutino na februari ta anuncia esaki. Y aki un biaha mas tabatin keho debi na molester grandi door di e trabaonan banda di Marawiel y Babijn como na Jaburibari.

PRENSA

Segun e fundacion, despues di e ultimo comunicado na November di aña pasa, minister Oduber a pone varios departamento na trabou pa haci investigacion. “Pero esey no ta notable ningun caminda”. Tur compania segun e fundacion, despues di e bouwvacantie a sigui traha sin e respectivo y necesario permisonan. Como tal Fundacion Conserva Area Cristal no por acepta esaki y ta spera cu tur e kehonan wordo trata dentro di e termino rekeri, teniendo cuenta cu e opinion publica di e mandatario cu e ROP ta wordo maneha como un ley.