Abraham: ‘Mi ta pasando door di episodio mas pisa di mi bida’

KRALENDIJK – ‘Mi ta pasando door di e episodio mas pisa di mi bida’. Cu e frase aki riba su pagina di Facebook, e politico popular di Bonaire Clark Abraham a kibra su silencio den fin di siman cu a pasa, manera cu e la confirma pa NoticiaCla awe mainta. Abraham recientemente a recobra su libertad temporal for di prison, despues di tabata deteni pa ‘violacion di su condicionnan stipula pa OM’. “Aunke cu mi ta profundamente alivia cu Ministerio Publico mes porfin a constata e realidad i a pidi vrijspraak riba e carga di mas grave contra di mi persona, cu ta supuesto maltrato di mi casa, e storia no a caba ainda” Clark a sigui bisa. E ta recorda cu dia 28 di Februari, hues lo duna su veredicto riba tur carga cu Ministerio Publico a presenta contra dje. “ Sperando e momento ey, mi ke bisa cu e sosten cu m’a ricibi di bosonan tur, a dunami forsa i consolacion durante di e periodo complica aki”. Abraham a sigui bisa. E tin confianza cu husticia lo wordu sirbi. “Mi ta trankil i determina, sintiendo den mi curason e amor cu boso a mustra mi. Awor, mi ke sigui ku mi bida, ku mi trabou pa e pueblo Boneriano, i mi no por warda te cu momentu cu mi por braza mi yiu atrobe”.

DETENCION

Hues-comisario (RC) a ordena diabierna 26 di januari 2018, detencion (gevangenhouding) di e politico Clark Abraham (Bonaire, 1980) pa maximalmente 30 dia. Mientrastanto a dagvaard Abraham pa su caso penal dia 7 di februari pa 15:00 or den Corte na Bonaire. C.A. ta ser sospecha door di Ministerio Publico BES di entre otro maltrato, stalking y huisvredebreuk, esta traspaso sin permit.

Despues dia 7 di februari, Abraham a recobra su libertad diaranson, pendiente e sentencia dia 28 di februari 2018. Ministerio publico a pidi vrijspraak pa Abraham riba cargo di maltrato. Huez a ordena su libertad mesora. Mientrastanto pa otro cargonan, a pidi castigo di prison di 128 dia di cual 90 ta condicional y 3 aña di prueba, y ayudo di instancianan profesional. Potret cortesia J Abraham.