Comision cu conseho riba ley ARUBIG dentro di 3 luna

ORANJESTAD – Dentro di tres luna un comision lo duna su analisis riba e situacion di registracion medico conoci como ley diBIG ( Wet op Beroepen in de Individuele Gezondheidszorg). Asina e comunicado emiti pa oficina di e mandatario responsable pa Salud, Dangui Oduber a bisa. Segun e comuniado, diahuebs ultimo Oduber a tene su prome reunion pa cu e implementacion di e ley ARUBIG. E comision cu a wordo institui ta consisti di diferente exportonan riba tereno di salud cu tin e tarea pa conseha e mandatario con pa reformula e ley di AruBIG pa por amplia e registration di BIG dunando chens na nos studiantenan cu a completa nan estudio den Region, Europa y/of Merca pa por traha den nos sistema di cuido pa asina aporta na un miho calidad di cuido pa nos cuidadanonan.

CONSEHO

Expertonan den e comision, segun e comunicado di gobierno lo duna nan conseho na Oduber dentro di un termino di 3 luna. E comision ya menciona tin tambe como tarea pa conseha e mandatario ariba e miho forma con pa institui e asina yama “kwaliteitsinstituut” cual lo ta responsabel pa acredita diploma di esnan trahando den e sector di cuido. Manera a yega di menciona anteriormente, Corsow ya caba tin e ley aki di BIG adapta na e situacion di studiantenan cu a finalisa nan studio den exterior. Minister Oduber a bisa di ta compromete su mes na sigi informa nos pueblo di e progreso di diferente puntonan di accion riba agenda pa cu mehoracion di nos calidad di cuido medico.

PROBLEMA

E ley (of falta di su adaptacion) ta e motibo pakico studiantenan cu ta studia medicina den region, tin masha problema pa eherce nan profesion medico na Aruba. Pa nan por yega na remarke pa por establece nan mes na Aruba, mester pasa henter un proceso di registracion riba nivel medico di Hulanda (BIG) prome cu ta asina leu. Den ultimo eleccion parlamentario na Aruba varios partido politico a usa e tema como un cabay di campaña y a haci promesa di 'awor si' resolve e problema aki. A usa e termino di entre 3 luna pa un aña pa por keda cla cu e registracion aki, dependiendo di e partido politico.