Surnam a cumpli y Insel Air Aruba tin su ‘derecho di aterisahe’

ORANJESTAD – Gobierno di Surnam diahuebs a otorga e compania Insel Air Aruba su ‘derecho di aterisahe’ na Surnam, y lo duna full cooperacion pa Insel Air Aruba por keda cla pa asina nan cuminsa bula mas lihe cu ta posibel. Esey ta e confirmacion cu minister di transporte di Aruba Otmar Oduber a duna NoticiaCla.com diahuebs atardi, ora cu e la caba haya e carta. “Mi a papia cu e minister di transporte y tambe a ricibi e carta” Oduber a sigui bisa. Cu esey tambe e ‘impasse’ entre e dos paisnan ta keda resolvi y e ultimatum y su consecuencia ta keda revoca.

Tabata gobierno di Surnam cu a notifica Direccion di Aviacion Civil di Aruba diahuebs mainta pa medio di un email , cu tin un carta na caminda cu un ‘toezegging’ pa Insel Air Aruba por cuminsa bula porfin. “Mi no a wak e carta ainda si” minister di transporte Otmar Oduber a bisa NoticiaCla.com diahuebs merdia. “Mi ta wardando e carta oficial yega pa wak kico ta kico”. E mandatario a bisa cu e no ta caprichoso tampoco di bay para tur cos, pa algun mei ora. Pero pa awe si, e ultimatum ta vence si e carta aki no yega. Mes momento Oduber a confirma cu a notifica personal di Surinam Airways diaranson, cu e chens ta grandi cu e buelonan lo stop aki 6 luna.

E mandatario tabata compronde cu normalmente e proceso aki ta dura mas largo pasobra e tin cu cana su caminda diplomatico. Pero den e caso aki tabata un situacion extremo unda cu a warda basta y tabata kier e asunto regla. Mirando cu e ultimatum a vence diaranson, pero cu e Consul General di Surnam actualmente na Aruba a pidi un extencion pa algun ora, a dune tambe. Ora cu e ora a yega diahuebs mainta, e mandatario di Aruba a keda notifica di e email. Y si ta papia di algun mei ora of ora, e no ta bay stroba e proceso pa ta un persona caprichoso.