SADA evaluando paso legal despues cu a ricibi contesta di gobierno

ORANJESTAD – Sindicato di douane SADA lo cuminsa cana e caminda di corte, ya cu e contesta di gobierno cu nan a ricibi diabierna mainta riba nan peticion, no ta cumpli cu e peticion. Asina presidente di e sindicato Eduard Maduro a bisa NoticiaCla diabierna merdia. Maduro a confirma cu enberdad nan a ricibi un contesta di gobierno riba nan peticion, pero cu e carta a yega un dia despues di nan ultimatum di 8 di februari, esta 9 di februari den ora di mainta. Y ora cu nan a ricibi e carta, e contesta no ta cuadra cu loke nan kier a tende. Como tal ta evaluando aworaki pasonan legal, mientras cu nan a confirma cu a bin un invitacion pa sinta cu gobierno diabierna atardi.

COMUNICADO

Mes momento e sindicato a manda un comunicado diahuebs pa stipula nan malcontento riba e forma con nan ta wordo trata. Base di e critica ta cu segun SADA, gobierno no ta tumando nan na serio. “Laga nos cuminsa na bisa cu nos di SADA no kier wordo envolvi den ningun wega politico y mucho menos wordo pinta como ‘muchanan manda’ di ningun partido politico. Nos ta para pa nos miembronan independiente e signatura di e gobierno. Esey nos a bin ta mustra bon cla den e manera cu SADA a opera e ultimo anjanan” e presidente ta bisa den e comunicado.

CONVENANT

Segun Maduro, e convenant ta e resultado di e trabou extensivo di un comishon consisti di DRH, leiding di Douane y SADA, cu a wordo instala por medio di un Ministeriële Beschikking na december 2016. E trabou di e comision a resulta den un acuerdo cu a wordo poni den convenant cu a wordo firma door di e Minister di Finansas anterior, director di Aduana, Landsbemiddelaar I SADA despues di a wordo aproba den ministerraad. “ Nos ta corda cu durante e proceso aki SADA a bai den accion na varios ocasion, na unda cu varios parlamentario di MEP, entrenan sra. Ruiz-Maduro, a expresa nan sosten na nos e tempo ey” Maduro ta sigui bisa.

CARTA

Pa bin bek riba e situacion actual, e sindicato ta bisa cu nan a manda un carta caba dia 5 di januari 2018 na e Minister di Finansas mr. X. Ruiz-Maduro tocante e convenant. “ Lamentablemente nos no haya ningun contesta riba esey, locual nos ta haya un falta di respet na nos miembronan cu nos ta representa. Despues cu e luna di januari a pasa tabata claro cu Land Aruba no cumpli cu e convenant y e derechonan di nos miembronan a keda viola, a jama un reunion dia 1 di februari 2018, cu nos miembronan. Eynan a dicidi di bolbe manda un carta y entrega esey na bestuurkantoor e mesun dia”.

BESTUURSKANTOOR

Na bestuurskantoor e Minister no kier a baha pa tuma e carta pero solamente kier a ricibi e president di sindicato y a nenga di laga otro miembro di bestuur drenta su oficina. E president di sindicato a informa e Minister cu asina p’e no ta un reunion oficial, debi cu no por sinta cu e Minister y su consehero sin bestuur di SADA. E Minister insisiti ja cu ta e ta dicidi I a ignora e peticion di e president di sindicato pa laga sikiera un miembro di bestuur ta presente. Pa sorpresa di president, e Minister a bira sarcastico y a burla di e posicion di sindicato despues di a lesa e carta cu SADA a bin entrega.

Ela bisa, cu si kier bai corte por bai corte numa, pero lo perde. E arogancia y falta di respet aki nos no a conoce di e Minister anterior. Tabata tin desacuerdonan y a jega di bai den accion varios biaha, pero semper e trato tabata cu respet pa otro.

“Nos ta puntra nos mes ta con nos lo wordo trata den añanan benidero cu un Minister cu ta mustra cu e no tin respet pa nos sindicato y asina pa e Cuerpo di Aduana en general. Mas nos ta lamenta locual ta e declaracion di e Minister durante su rueda di prensa tocante e situacion, cual pa SADA tabata completamente fo’i sla. Ta comosifuera e Minister ta kere cu ainda e ta den campaña y no kier atende asuntonan cu ta cay bou di responsabilidad di un minister” e sindicalista ta sigui bisa.

DEADLINE

Pa finaliza mester pone enfasis cu den e carta cu nan a entrega dia 1 februari 2018, no a haci ningun tipo di peticion pa reunion cu dicho mandatario, pero mas bien den e carta nos a bisa e Minister ‘cla I raspa’ cu e deadline pa Land Aruba confirma cu nan lo cumpli cu e convenant ta vence 8 di februari 2018. “Dado caso no bin contesta por escrito, no lo keda nos otro opcion di busca locual ta e derechonan di nos miembronan dilanti mesa berde”. Te ey e carta/comunicado di e sindicato, cu manera indica caba, ta mustra cu e lo bay para dilanti mesa berde.