Aduana a confirma cu a intercepta mangelnan cu tipo di droga THC

ORANJESTAD - Departamento di Aduana awe mainta a confirma e informacion cu nan a intercepta mangel cu tipo di droga for di Merca drentando via un turista na aeropuerto, pero ta lamenta cu e informacion aki a sali for di un fuente no oficial y cu esaki a crea un panico y preocupacion den nos comunidad. Mes momento a admiti cu den futuro lo informa comunidad mas lihe di e caso aki. Door cu nan tabata 'laat' cu esaki, e noticia a plama rond recientemente rond Aruba via tanto whatsapp como Facebook, alertando principalmente mayornan di cu e droga aki ta riba Aruba. 

E CASO

A splica atrobe cu ta trata di un caso di control di aduana riba un pasahero procedente di Newark unda cu a bin constata un paki di mangel cu caracteristica di “gummies” den forma di “bichi colorido”. Riba e envoltura di e paki por a tuma nota di e indicacion THC y por a wak e nomber “Unforgedibles”. E envoltura di e paki ta indica un cantidad di 250 gram.

CUSTUMBER

Departamento di Aduana ta enfatisa cu droga y productonan cu ta contene THC ta wordo intercepta regularmente y no tur ora esaki ta sali den medionan di comunicacion of social media. E THC ta bin hopi biaha den diferente forma y productonan manera entre otro azeta, crema, likido, mangel y zalf.

Mirando cu esaki a bin di Merca, e Departamento di Aduana lo focus mas riba e vuelonan for di Merca cu ta origina for di estadonan caminda e productonan cu ta contene THC ta legal. Juist door di cu Aduana ta traha di un forma alerto, nan ta cai riba e tipo di productonan cu ta prohibi pa drenta Aruba. Banda di esaki Departamento di Aduana lo bay tene conversacionnan cu ATA, AAA y APA pa asina informa aerolineanan, crusero nan cu e productonan aki no por drenta Aruba.

THC

E producto yama THC cu ta Tetrahydrocannabinol, cu ta un compuesto chemical den cannabis y ta legal den varios estado Mericano. E ta bin den hopi forma, y hopi popular den forma di mangel estilo gummies, of ‘bichi colorido’.