Otro siman tur partido envolvi ta topa pa resolve protocol di douane

ORANJESTAD – Otro siman tur partido envolvi, SADA, hefe di douane, minister, DWJZ y DRH ta sinta pa yega na un solucion pa e ‘protocol’ di douane. E protocol firma na juli 2017 pa ex minister Bermudez, ta pega cu a causa cu pagonan di periodiek no a tuma lugar fin di luna pasa. Consecuencia tabata un protesta di douaneronan siman pasa. E mandatario a sigura cu e tin e asunto como ‘un’ di e prioridadnan pa regla, pero mester bisa cos manera cu e ta, esta cu cos no a keda regla manera mester ta.

PEGA

E protocol berdad a wordo firma segun Maduro, pero e proceso no a cana su caminda na tempo pa por a cumpli cu pagonan di periodiek pa e personal necesario. E hecho cu miembronan di gobierno anterior awor ta hunga comedia cu cierto potret pa desmenti e tardanza, e mandatario a tuma na malo. Segun Maduro, e realidad ta cu ex minister Bermudez a firma e protocol na juli 2017 pero no a manda esaki pa Departamento di Legislacion pa asina e landsbesluit, h.a.m., por wordo traha. Esaki mester pasa su proceso bay pa conseho na Raad van Advies. Segun e mandatario nos tur sa si bo ta entrega e peticion na 7 di november 2017, esaki nunca lo por keda cla pa 1 of 31 di januari siguiente, ya cu tin dianan di fiesta y e departamento aki tambe tin nan agenda di prioridad pa traha cu ne.”Minister Bermudez a dega y a warda 5 luna pa manda e peticion pa Departamento di Legislacion y awor ta pretende cu e departamento ta core bay traha riba dje y keda cla di biaha” Maduro a bisa. Otro siman e asunto ta wordo discuti pa wak con lihe por yega na un solucion.

PRECEDENTE

E problema cu e mandatario ta anticipa, ta cu fuera di e personal di douane cu mester bin na remarke pa e dos periodiek, awor ta resulta cu tin un grupo di 29 hende cu no ta douanero pero personal administrativo, tambe nan kier pa forma parti di e ‘deal’. Segun Maduro, si duna aden pa e grupo aki tambe haya e pago, tin 2000 otro ambtenaar cu tambe lo kier bin na remarke, cu ta nifica 5.6 miyon florin extra di gasto pa aña. Anto esey ta algo segun Maduro, cu gobierno no tin aworaki, esta placa.