Knops a huramenta Mike Franco awe tardi den su funcion nobo

ORANJESTAD – Secretario di estado pa Relacionan di Reino Knops a huramenta Marcolino (Mike) Franco diaranson merdia como e comisario di gobierno di St Eustatius y Mervyn Stegers como su reemplazante. Manera NoticiaCla a raporta anteriormente, Franco a keda apunta pa e funcion ey.

TAREA

E tarea di Franco ta pa ehecuta tur tarea y autoridad di Bestuurscollege y Eilandsraad. Esaki lo dura te ora cu e gobierno di e isla ta capaz pa haci esaki su mes. E ora lo yama eleccion pa un gobierno nobo cuminsa traha. Franco lo reuni frecuentemente cu e ciudadano y companianan di e isla. Tambe e lo instala un organo consultativo social cu lo conseh’e ora cu e mester y tambe independientemente. Franco ta fysioterapeuta di profesion pero a fungi 20 aña como politico y tin experiencia amplio riba e tereno gubernamental. E tabata presidente di Parlamento di Corsou entre 2012 y 2016. Mervyn Stegers tabata abogado y docente despues el a fungi como alcalde di Tubbergen.