Oduber lo apela sentencia di Lotto y kier cuminsa otro fundacion

ORANJESTAD – Minister di Deporte Dangui Oduber ta evaluando pa bin cu un otro fundacion pa deporte, banda di esun existente. “Por lo menos mi ta bezig ta brainstorm ariba dje” Oduber a confia NoticiaCla diaranson atardi despues di un conferencia di prensa riba e tema. Ademas el a confirma cu e lo apela e sentencia di awe. Manera ta conoci Corte a dicta awe mainta cu gobierno no por retira e miembronan di hunta di comisario, pero mes momento e hunta di comisario a keda declara no admisible den e caso sumario cu nan a cuminsa pa bringa nan retiro. Nan tin 4 siman pa cuminsa un asina yama ‘bodemprocedure’ pa bringa e caso y tanten nan por keda den e funcion.

MAN MARA

Oduber den e conferencia di prensa no tabata nada contento cu e sentencia, aunke a bisa cu no ta gobierno a perde e caso. Di otro banda, huez a mara su man den sentido cu e no tin ‘boz’ den e fundacion. Su argumento pa kita e miembronan ta pasobra e no tin confianza den nan, y a menciona varios punto pakico. Entre nan, cu un di nan ta casa cu ex parlamentario di partido AVP. Ademas, e miembronan y e presidente ta nenga di duna contesta na e minister riba preguntanan recien haci. Y mirando cu huez no a mara e miembronan di hunta di comisario na un multa si nan no cuminsa e bodemprocedure den 4 siman di tempo, e cos aki por dura pa largo. Como tal e mandatario ta evaluando pa bin cu un otro fundacion pa asina sikiera e por implementa su maneho manera cu a keda propaganda den campaña, y awor den programa di gobernacion.