Gobierno a anuncia posibilidadnan ‘nobo’ pa rebiba San Nicolas

SAN NICOLAS – Un posibel universidad cu campus, hotel na Seroe Colorado y creacion di lugar pa tiendanan chikito ta algun di e posibilidadnan pa rebiba San Nicolas. Despues cu gobierno a haye ta revoca e maneho fiscal beneficioso pa San Nicolas entrante 1 di februari, awe gobierno a anuncia alternativa pa San Nicolas. Segun prome minister Evelyn Wever Croes, ta trahando riba alternativanan menciona pa atrae inversion den San Nicolas, basa riba un plan integral pa desaroyo di San Nicolas; e main street y vecindario.

REFINERIA

Pa loke ta e terenonan di refineria cu no ta wordo uza mas, lo bay bek pa pais Aruba. Momento cu elimina e muraya di 'LAGO', lo crea acceso pa lama, pa henter comunidad. E intencion ta pa crea un area di 'Waterfront' pa haci San Nicolas atractivo pa negoshinan den horeca. Museonan lo wordo traha y finaliza, pa asina atrae e turista cu ta gusta arte, pa e bay San Nicolas. Pues: San Nicolas lo bira e ciudad cu e forsa atractivo caribense, cu ta atrae tur turista.

LAMENTO

Gobierno a lamenta cu mester a elimina e regimen fiscal favorable pa San Nicolas, sinembargo e regimen aki no a trece desaroyo pa San Nicolas y ademas ta causando Aruba hopi problema. Un biaha mas e pueblo di San Nicolas a wordo engaña pa partido AVP. Pesey nos gobierno ta compromete su mes cu crea otro oportunidadnan pa realmente trece desaroyo den San Nicolas. Portret ta di archivo.