St Eustatius ta demanda revocacion di intervencion Hulandes

WASHINGTON/ORANJESTAD - Gobierno di St Eustatius (Statia) ta demanda di gobierno Hulandes pa revoca e intervencion gubernamental basa riba base legal y moral. Asina e abogado Mericano cu e isla a busca pa represent’e, Jared Genser a bisa e secretario di estado pa asuntonan di Reino Raymond Knops den un carta. Knops mientrastanto ta na caminda pa Statia unda cu awe tardi e ta papia cu e pueblo di e isla durante un ‘Town Hall Meeting’. E carta di dos pagina, cu un tono fuerte, ta hala atencion di Hulanda riba varios punto internacional, y ta mustre riba su accion ‘ilegal’ y ‘no constitutional’ di actua e siman aki. Si Hulanda no revoca su decision, ‘e isla lo defende su mes agresivamente tanto local como internacionalmente’.

FAYO

Genser ta urgi gobierno Hulandes pa ‘deshaci di su decision’ cu e ta yama ‘ultra vires’, cu ta nifica ‘ Fuera di un hende su poder legal of autoridad’, indicando cu Hulanda a surpasa su autoridad legal. “Accion di bo gobierno, no ta digno di un bon democracia” Genser ta sigui bisa. “Den un accion aki, bo ta nenga e gobierno eligi y su hendenan pa haci nan cos, esta pa un tercer partido neutral revisa e caso y tambe nenga cualkier posible oportunidad pa reta bo decision” Genser ta bisa. Ademas e ta recorda e secretario riba e constitucion Hulandes cu ta referi na e parti cu ta haci mencion cu tratadonan internacional ta surpasa ley Hulandes pa cua e gobierno a uza pa tuma nan decision.

BISHITA

Mientrastanto ayera (manera NoticiaCla a raporta caba) Eerste y Tweede Kamer unanimamente a aproba e ley apoderando gobierno Hulandes pa interveni den gobierno di e isla Caribense. Mes momento e secretario di estado Raymond Knops ta biahando awe pa Statia pa awe tardi confronta e pueblo cu e decision, y anuncia mesora tambe ken ta bira e comisario di Reino cu lo tin cu maneha e isla temporalmente. Lesa e carta completo di e abogado di Statia , Jared Genser AKI. Portret ©Hollandse Hoogte