IVA: No cumpra remedi via rednan social manera Facebook

ORANJESTAD – No cumpra remedi via medionan social manera e.o. Facebook, of otro forma online. Esey tabata e mensahe principal di tanto Inspeccion di Salud (inspectie) y ministerio publico diamars mainta. Segun Inspector General di Salud Dorylee Pappers, compra di remedi riba Facebook por tin peliger pa bo salud. Y esnan cu ta bende esaki, por wordo persigui penalmente ya cu e ta algo illegal. Un acuerdo pa medio di un protocol ta facilita e control ehecuta pa dos organo, esta OM y Inspeccion di Salud. Un di e puntonan principal ta pa evita benta illegal di remedi via e red socialnan manera Facebook y otro caminda cu no ta legal. Y cu e protocol, partidonan por actua mas miho.

COVENANT

Pa tin miho control y cooperacion entre varios departamento, a firma un protocol di cooperacion (covenant) awe mainta entre Departamento di Salud y Ministerio Publico, aunke cu tin un ley pasa for di 1 di januari 2017, cu ta duna Inspeccion di Salud como organo independiente e responsabilidad y poder pa controla cuido di nos ciudadanonan, cu ta encera tambe control riba remedi.

PG

Segun Procurador General Alexander van Dam, for di 1 di januari 2017, tin un ley (LV Kwaliteit In gezondheidzorg) na vigor. Pa medi di e ley aki Inspectie Volksgezondheid como organo independiente, ta responsabel pa control riba e cuido di e ciudadanonan na Aruba. Banda di esaki OM ta responsible pa e persecucion penal di violacion riba e tereno aki. E firmamento di e covenant aki tabata den un esfera mas festivo awe, aunke cu e control y leynan ta aplicable caba.

ANTIBIOTICA

Entre un di e problemanan cu tin segun Pappers, ta cu hendenan ta busca remedi pa p.e. dolor di cabez via compra riba Facebook, cu ta un peliger. “Si bo tin un infeccion y bo tin cu wordo trata pa un antibiotica, e no ta traha mas” Pappers a bisa, pasobra porta bo curpa ta resisti esaki debi na otro remedinan cu bo a tuma. “Nos kier proteha nos comunidad contra esey”, Pappers a bisa. Den e caso aki specifico, ta bringando e practica di benta di remedi, sin cu esaki a keda prescribi pa un docter. Berdad cu tin casonan di personanan cu ta prescribi remedi, pero cu no ta docter, pero den e caso awor, ta trata specificamente e benta di remedi sin cu el a wordo prescribi. “Ken cu ta, ta bin cu remedi di unda cu ta, y ta bendele. No tin e toetsing cu tin cu tuma lugar” Pappers a sigui bisa. Un docter ta haci un test cu e pashent y a base di esey ta prescribi un remedi. “Nos kier proteha (contra e hecho) cu abo mes ta selfmedicate bo mes” Pappers a bisa. Como ehempel e ta mustra cu un persona tin dolor di cabez y ta tuma un antibiotica cu e la cumpra online. “Esey ta un peliger hopi hopi grandi, pasobra pa dolor di cabez antibiotica no ta yuda tampoco” Pappers a finalisa bisando.