Oduber: Carta cu ‘toezegging’ di Surnam pa Insel Air Aruba na caminda

ORANJESTAD – Gobierno di Surnam a notifica Direccion di Aviacion Civil di Aruba diahuebs mainta pa medio di un email , cu tin un carta na caminda cu un ‘toezegging’ pa Insel Air Aruba por cuminsa bula porfin. “Mi no a wak e carta ainda si” minister di transporte Otmar Oduber a bisa NoticiaCla.com diahuebs merdia. “Mi ta wardando e carta oficial yega pa wak kico ta kico”. E mandatario a bisa cu e no ta caprichoso tampoco di bay para tur cos, pa algun mei ora. Pero pa awe si, e ultimatum ta vence si e carta aki no yega. Mes momento Oduber a confirma cu a notifica personal di Surinam Airways diaranson, cu e chens ta grandi cu e buelonan lo stop aki 6 luna. Pero ainda e mandatario no a tuma e desicion final si ta para e buelonan pa y for di Surnam di e aerolinja surnamenjo. 

E mandatario ta compronde cu normalmente e proceso aki ta dura mas largo pasobra e tin cu cana su caminda diplomatico. Pero den e caso aki ta un situacion extremo unda cu a warda basta y tabata kier e asunto regla. Mirando cu e ultimatum a vence diaranson, pero cu e Consul General di Surnam actualmente na Aruba a pidi un extencion pa algun ora, a dune tambe. Ora cu e ora a yega diahuebs mainta, e mandatario di Aruba a keda notifica di e email. Y si ta papia di algun mei ora of ora, e no ta bay stroba e proceso pa ta un persona caprichoso. Pues ainda no tin un confirmacion preto riba blanco, pero   un email cu ta bisa cu e ‘carta’ ta na caminda. “Mi a pidi nan pa email mi mientrastanto por lo menos e carta aki” Oduber a bisa.

Tabata diaranson atardi cu gobierno di Aruba a extende e ultimatum pa gobierno di Surnam riba cancelacion di buelo di Surinam Airways, te diahuebs 10 or di mainta. Esaki a keda confirma pa minister Otmar Oduber diaranson anochi na NoticiaCla.com. Segun e mandatario, e peticion pa extende e ultimatum di diaranson atardi 5’or pa diahuebs mainta 10’or, ta riba peticion di e consul general di Surnam cu ta na Aruba actualmente. Pero esey ta e ultimo chens cu ta wordo duna. Si pa 10 or diahuebs mainta no tin contesta, lo a cuminsa cu e proceso pa para buelonan di Surinam Airways aki 6 luna. Y segun e mandatario, unabes cu e decision ta tuma, no por bira esaki bek. Por lo menos, e ta mira esaki hopi improbable.

E mandatario ta lamenta cu cos mester yega asina lew, mirando cu Aruba a coopera tur cu tin cu e Memorandum of Understanding cu Surinam Airways, unda cu a extende e frecuencia di buelo di 2 te na 3. Algo cu Surnam sinembargo di nan banda, no kier reciproca.

Reaccionando riba e declaracion di CEO di Insel Air Aruba Frederick Nuboer, -cu algun rato prome diaranson a declara na NoticiaCla.com cu e boycott di Aruba contra Surnam ta afecta e aerolinea tambe-, Oduber a bisa cu Insel a wordo perhudica caba sin cu nan a cuminsa nan operacion mes. “Pa e motibo ey mes, tin un MOU, y si no respeta esaki, no tin motibo pa continua esaki. Pesey nos ta tumando e pasonan necesario”.

E pregunta ta keda cu si unabes gobierno di Aruba implementa e boycott, si na caminda Surnam dicidi di toch coopera, y si esey ta posibel. Segun Oduber, e no por imagina cu pais Aruba tin cu conduci su mes a base di agenda di otronan. “Tin acuerdo nan y cu tin cu respeta esaki”. Corsow mientrastanto no a haci intento pa yuda soluciona esaki segun Oduber.