No ta tene cuenta cu reapertura di refineria den presupuesto 2018

ORANJESTAD – Gobierno no ta bay tene cuenta cu e reapertura di e refineria, ora cu nan traha e presupuesto pa 2018. Asina prome Minister di Aruba Evelyn Wever Croes a bisa den conferencia di prensa awe mainta. Mirando e situacion insigur di e proceso ey, e ta stroba e gobierno di tin un presupuesto mas realistico. Segun e prome mandatario, si hinca e refineria aden y resulta cu no por conta cu e placa ey, e ta bira un problema atrobe pa nan despues. Como tal a dicidi cu no ta bay tene cuenta cu e placa ey, cu ta haci e presupuesto ‘mas realistico’. Algo cu e gobierno anterior absolutamente a haci.

CAFT

Wever Croes a confirma na mes momento cu nan lo cumpli cu peticion di e colegio di supervision financiero e siman aki, entregando un plan di drecha e situacion financiero di Aruba, pero no a indica con lo haci esaki. El a splica cu no kier ‘djis hisa benta’ y implementa medida pa haya mas placa, pero ta pensando den un ‘verschuiving’ di impuesto directo na indirecto. Aunke den mesun rosea, Wever Croes no por a bisa exactamente ainda ki forma lo haci esaki. Ta conoci cu pa comienso di april e presupuesto nobo mester ta cla.