Hulanda a tuma gobernacion di St Eustatius over

DEN HAAG – Hulanda ta tuma gobernacion di St Eustatius over. Esaki ta nifica e.o. cu ta disolve parlamento, e diputadonan y gezaghebber (interino) ta wordo poni ‘un banda’. Un comisario di Reino lo tuma e mando over temporalmente. Asina secretario di estado Raymond Knops a dicidi, basa riba e raport di sabio, den cual ex gobernador di Aruba Fredis Refunjol a forma parti.

BISHITA

E mandatario Hulandes ta biaha pa e isla e siman aki mes pa participa e noticia personalmente na e 3.100 habitantenan di e isla. Mientrastanto Parlamento Hulandes lo haya e documentonan, necesario cu ta encera un debate y aprobacion di e ley, cu ta duna Hulanda aprobacion pa interveni riba e isla.

RAPPORT

E comision a indica mal trabou severo presta pa e gobierno di e isla chikito. Palabra manera anarkia y mal maneho financiero ta entre otro loke e comision a constata. Esaki segun Knops, ta bay acosto di e ciudadanonan y comercio. Y mirando cu e otro medidanan aplica no a yuda cambia e gobierno, a dicidi awor pa aplica e medida mas severo cu ta: intervencion.

FUTURO

E comisario di reino lo eherce tur tarea di e gobierno y esaki lo dura te ora cu gobierno ta capaz di eherce su funcion atrobe. Despues di esey por bin eleccion pa un parlamento nobo, cu por asumi su responsabilidad.