Ex minister Sevinger a nenga reacciona pa rapport di ARA

ORANJESTAD – Ex minister di infrastructura Benny Sevinger a ignora intento di Algemene Rekenkamer di Aruba (ARA) pa reacciona riba e rapport di e proyecto Bo Aruba. Den e rapport mientrastanto cu a keda publica diabierna, ARA ta haci mencion specifico di e caso aki. ARA ta bisa eyden con repetidamente a busca contacto cu e mandatario, conforme regla, pa su reaccion. Segun regla, e minister mester reacciona pa despues ARA incorpora su reaccion integralmente den e rapport, hunto cu un palabra di ARA. “Sinembargo e reaccion di e mandatario a keda afo’, ARA a bisa.

INTENTO

Segun ARA, nan a ofrece e mandatario en cuestion for di 21 di februari 2017 e raport, cu e peticion pa duna su reaccion riba dje, prome cu dia 14 di maart 2017. “Sinembargo no a haya e reaccion” ARA ta sigui bisa. “Despues di varios intento oficial pa haya un reaccion di e minister, ARA a manda e minister un ‘recordatorio’ unda cu un biaha mas ta urgi e mandatario pa su reaccion pa asina ATA por conclui e proceso di investigacion segun e forma corecto”. ARA a mustra cu den e ‘recordatorio’ a duna e mandatario te dia 4 di april 2017 pa duna su reaccion, pero nada. A sigui multiple recordatorio oficial, y riba 7 di juni (despues di 4 luna di intento), a manda bisa e mandatario cu ta lamenta cu e mandatario no a reacciona, y cu e rapport lo keda publica den e di 4 kwartal di di 2017, den e caso aki, sin un reaccion oficial (di gobierno).

CONSECUENCIA

No ta conoci ki consecuencia e proceso aki por tin, y kico por a pasa pakico e mandatario no (kier) a reacciona riba e rapport di ARA. Hecho ta si cu e no ta normal, segun ARA mes ta bisa, ya cu e ta un proceso normal cu un mandatario of gobernante tin cu reacciona, pa completa e proceso di un investigacion di tal indole. Por lesa e rapport completo di ARA riba BO Aruba, AKI.