Ocho menor di edad deteni durante lighting parade

ORANJESTAD – Ocho menor di edad a keda deteni durante lighting parade na Playa e aña aki. Un cifra hopi alarmante y cu polis den su raport ta yama ‘remarcable’. Segun Cuerpo policial di Aruba, e casonan di detencion durante y despues di lighting parade a aumenta bastante e aña aki. Comparando cifra, esaki ta mustra cu e aña aki tabatin 12 detencion mas cu aña pasa durante e parada. Como si fuera esaki tabata tur, loke a hala atencion tabata e hecho cu di e 17 detencionnan, 11 tabata hende bou di 20 aña. Mas remarcable tabata e hecho cu di e detencionnan total, 8 di e detencionnan aki, tabata di muchanan menor di edad. Un caso sigur cu merece atencion y ta un grito di auxilio pa haci algo pa frena e ‘trend’ alarmante’ aki.

CIFRANAN

Segun KPA, na 2018 tabatin 17 detencion total, compara cu 5 den 2017. Di e detencionnan ey, 8 tabata menor di edad di cual e edad mas jong tabata 15 aña (3 hoben). E persona mas bieu deteni tabatin 46 aña, y 11 persona tabata bou di 20.