Colegio Arubano: Problema pa haya docente pa e materia Economia

ORANJESTAD – Colegio Arubano ta admiti cu nan tin problema (reto) pa haya docente reemplasante pa e materia di economia. Esaki despues cu siman pasa un grupo di alumno di e scol a bay keha cerca minister di enseñansa Rudy Lampe. “No ta facil pa haya docente remplasante cu ta capacita pa duna les den examenklas” e scol ta manda bisa den un comunicado diabierna atardi. Segun e comunicado, na november ora cu un docente a bira malo, Colegio no a para keto y mesora a saca un anuncio den corant. Esaki no tabata tin resultado. Tambe a tuma contacto cu diferente scol, pensionado, Examenbureau y Inspectie.

ANUNCIO

E scol a mustra cu manera nan a anuncia na comienso di aña escolar, Colegio kier enfoca riba e cosnan positivo. Colegio ta den deliberacion cu tur stakeholders tocante plannan pa mehoracion. Nan ta sigura cu nan tinun bon relacioncu Directie Onderwijs, Inspectie y Minister. Mas cu claro, tambe cu nan alumno-, mayor- y docentenan. Den enseñasa, e unico manera pa traha, ta pa medio di colabora un cu otro, y pa haci esaki e relacion mester ta bon cu tur partido.

“Den e reto pa haya docente di Economia nos por a experencia con colaboracion cu otro ta traha. Via CSN nos a haya contacto cu docente pa yuda nos, pero no tabata posibel pa pone tur les den siman. P’esey a bin cu e opcion pa duna les riba diasabra”. Tambe nan a ofrece e alumnonan, 5 biaha pa siman les, en bes di 4 biaha y a adapta e SE-stof. Tur esaki tabata prome cu e alumnonan a bay Minister. E diasabra tabata un problema pa e alumonan pero na niun momento nan a bin papia esaki cu Schoolleiding, locual colegio ta lamenta. Di otro banda nan ta contento cu despues di esaki nan por a papia cu e alumnonan y scucha nan, y mustra nan cu nos porta semper ta habri.

Nos ta contento cu nos relacion cu Minister ta bon y prueba di esaki ta, cu ora Minister a scucha e alumnonan, el a tuma contacto mesora cu scol. E manera di traha aki nos ta aplaudi y ta spera di sigui traha asina den futuro. Un citado di Mattie Stepanek ta bisa asina: “Unity is strength … when there is teamwork and collaboration, wonderful things can be achieved.”

Pa awo nos por a soluciona e problema pa examenklas. Colegio Arubano kier enfatisa, cu nos meta ta pa tur alumno caba scol cu nan diploma.

Tambe na Colegio Arubano nos a realisa nos proyecto di digitalisacion den Ciclo Basico 1, cu ta canando hopi bon, y pa otro aña escolar lo sigui pa Ciclo Basico 2. Esaki ta tambe den liña di loke Minister ta promove: ‘mas manera innovativo den enseñansa’. Claro, tur cos den fase y segun cu nos por maneha. Colegio tambeta trahando cu proyectonan di intercambio cu scol na Hulanda, cu ta ofrece nos muchanan un tremendo experencia. Pa haci e proyectonan aki posibel, e alumnonan lo acerca comunidad pa coopera cu yudansa financiero. Di awo caba Colegio kier gradici tur cu ta yuda den esaki.