Zijlstra: Frontera cera cu Venezuela por dura te eleccion presidencial

DEN HAAG – Gobierno Hulandes ta tene cuenta cu e ciere di frontera entre Venezuela y islanan ABC por dura por lo menos te cu e proximo eleccionnan presidencial na april proximo. Asina minister Hulandes di relacionan exterior Habe Zijlstra a bisa den Tweede Kamer e siman aki, y ta raporta pa prensa Hulandes.

BARKITO CU CUMINDA

Debi na e ciere di frontera, no tin barconan cu cuminda yegando e islanan ABC mas y esey ta perhudicando hopi negoshi riba e islanan. Ta purbando pa haya alternativa, pero e ta birando mas caro. Venezuela a cera frontera comienso di aña pasobra e respectivo islanan no tabata haci nada pa combati e contrabanda di cuminda y material. Mientrastanto Venezuela lo a link e sancionan di Union Europeo tambe cu esaki y segun Zijlstra, esaki ta completamente incorecto.

PERHUDICA LOCALMENTE

Mientrastanto e ciere di frontera ta afectando Venezuela mes tambe. E gobernador di e estado Falcon a pidi caba, segun Zijlstra, pa revoca e medida y pa habri e frontera. Esaki pasobra e impacto economico pa su estado ta mucho grandi.