KVK ta mustra su preocupacion cu e situacion laboral di douane

ORANJESTAD – E postura di douaneronan caminda cu a pone trabou abou ta causando hopi problema pa henter comunidad. Asina e gremio comercial Camara di comercio (KvK) a bisa diabierna, un dia despues e accion cortico di douane di diahuebs. Kvk ta e di dos gremio cu ta reacciona riba e tema, despues cu ATIA tabata e prome pa haci tal un dia prome. E problema tabata cu e convenio firma entre Douane y Gobierno anterior pa drenta na vigor 1 di januari e aña aki no a wordo cumpli y esaki a crea un disgusto cerca Douane cu a expresa esaki via nan sindicato. Di banda di Gobierno a sali e declaracion cu nan mester tempo pa por actualisa riba e tema.

REACCION

Camara di Comercio y Industria di Aruba (KvK) por compronde nan disgusto pero ta sigur cu tin formanan mas acceptabel pa protesta sin mester di costa henter e pais miyones di benta perdi, productonan vegetal cu ta core risico di daña pa retraso y cu pueblo tin cu bira victima di no por ricibi su mercancianan procedente di exterior.

RESPONSABILIDAD

KvK ta urgi e sindicato y lidernan laboral di Douane pa nan tene mas responsabilidad den nan accionnan y corda kico ta e consecuencia. No mester neglisha y core riesgo pa no permiti remedi y otro ekiponan medico di pasa via nos waf y aeropuerto. Escasez di remedinan special por costa bida di hende. Ta un prijs halto pa mester carga cune y KvK sigur no ta para tras di esaki. “ Nos kier ilustra y ta spera cu e ta duidelijk cu e manera di protesta aki ta causa daño na nos comunidad y esaki ta algo cu ningun hende por hustifica y pesey ta pidi consideracion pa e consequencia cu e por crea” e comunicado ta bisa. KvK lo reuni cu e sindicato di Douane y Gobierno pa discuti e punto aki y asina haya claridad di nan banda y lo pone urgencia pa asina normalisa e situacion bek.