BCA: Gobierno a ricibi menos na entrada na november 2017

ORANJESTAD – Gobierno a ricibi 13.2 miyon menos na entrada na November di aña pasa compara cu un aña anterior. Asina Banco Central ta raporta diabierna den nan rapport pa e luna corespondiente di 2017. Segun BCA, na November 2017, entrada di gobierno a suma Afl. 90.0 miyon. Esaki a resulta for di bahadanan den tanto entrada di impuesto (-Afl. 8,1 miyon) como entrada no relata na impuesto (-Afl. 5,0 miyon).

MOTIBO

E caida den entrada di impuesto ta relata principalmente na menos entrada for di impuesto riba ganashi     (-Afl. 20,1 miyon) y riba e asina yama “overdrachtsbelasting” (-Afl. 2,8 miyon). E bahadanan aki a wordo parcialmente mitiga pa mas entrada for di accijns riba gasoline (+Afl. 5,3 miyon), impuesto riba entrada (+Afl. 4,9 miyon), benta di negoshi (B.B.O.) (+Afl. 1,8 miyon), impuesto riba importacion (+Afl. 1,5 miyon) y impuesto riba entrada (+Afl. 1,2 miyon).