Maneho uso di celular den banco y otro lugar cambiando

ORANJESTAD – Uso di telefon cellular den varios departamento di gobierno y instancianan priva pa un gran parti ta prohibi. Lugarnan manera WEB, Elmar y te hasta departamento di impuesto no ta permiti uso di celular. Motibo duna semper tabata e aspecto di seguridad, contra posibel robo of atraco. Sinembargo varios lugar a cuminsa adapta nan pensamento riba e tema. Entre nan varios banco a cuminsa permiti uso di telefon celular, aunke si ta   solamente pa uso di data y no yamada. Segun miembro di asociacion di banco na Aruba Pierre Rafini, ta depende di cada instituto, con nan ta atende cu e asunto di celular.

RISICO DI SEGURIDAD

Segun Rafini, e ta keda na e aspecto di risico di seguridad di cada banco pa cu e uso celular. Rafini ta hefe di e instituto financiero RBC Bank. “Nos ta allow data usage. No pa bo contesta telefon of haci yamada. Pero si pa bo bay riba internet, whatsapp y check bo emails” Rafini a bisa. E motibo ta cu nan kier motiva mas uso di transaccion bancario electronico for di nan telefon of iPad. “Si un cliente por bin den un branch di un banco, y si e tin data, enbez di haci un transfer cerca e cahera, e por haci esaki usando su telefon. E ta nifica cu e ta den banco, wardando pa un otro servicio pero por uza su telefon pa haci mas transaccion ainda pa cual e no mester uza un cahera. “Otro banconan tin nan security policy ainda caminda cu nan ta bisa cu pa motibo di seguridad pa cu e banco y otro cliente, nan no ta permiti esaki. E motibo ta cu si tin un hende cu kier atraca e banco, porta e por ta mandando señalnan afo pa esunnan cu kier atraca. “Pero si nan ta di atraca, nan ta atraca” Rafini a bisa.

CAMBIO

Cierto banconan (manera RBC) a dicidi pa adapta nan policy riba e uso of no uso di telefon celular, y ta brinda e servicio ey awor tambe. Tin a bay asina leu di propaganda “free wifi’ den banco, ora cu bo usa nan facilidad online den e banco. Otronan ta dunabo e opcion pa envez di cana cu papel di prueba di pago, pa mandabo esaki mesora via bo email. Menos uso di papel, y tur cos ta keda digitalisa. Banconan cu a adapta nan politica ta entre otro CMB, Aruba Bank y RBC. Banco di Caribe ainda no ta permiti uso di celular. Pa loke ta institutonan no bancario, WEB y Elmar no ta permiti e uso, y for di director di impuesto a confirma cu nan tampoco no ta permiti e uso di celular, aunke cu aki aya hende ta purba toch. Tur ta pa motibo di seguridad.

REACCION

Reaccion di varios hende den comunidad riba pregunta di e portal aki riba e tema, ta cu nan ta aplaudi e cambio aki di idea, ya cu e ora e persona ‘no ta perde su tempo’ na un banco p.e., y por sigui haci su trabounan electronico. Otronan no ta mira e esencia di no tin celular den un facilidad, pasobra manera cu Rafini mes a bisa, si un hende kier atraca, e ta bay atraca. E no ta bay tin mester necesariamente di un un celular.