ATIA preocupa cu accion di douane den nos waf awe mainta

ORANJESTAD - ATIA a wordu informa awe mainta trempan, cu douane ta tene un reunion den nos waf awe mainta cu a cuminsa 8or, cu tin como consecuencia cu e trabou di saca container no por tuma luga.

Ariba esey, pa motibonan fuera di control di cualkier instancia, e barco for di Miami ta den nos puerto awe mainta. Comercio y nos economia ta depende completamente di e cadena di importacion . Nos tur mester realiza cu si e cadena di importacion aki kibra, Aruba ta bira sumamente vulnerable,y ta causa un scarcedad inmediato di producto esencial ariba nos isla.

E barco concerni den nos waf ta subastia Aruba cu casi 70% di producto for di Merca, entre otro berdura I fruta I un gran cantidad di otro producto pa comercio I pueblo.

ATIA ta considera tur instancia envolvi den e cadena di importacion partnernan importante pa comercio i nos economia, I ta aplaudi e cooperacion I coordinacion cu e instancianan aki sa duna pa nos importacion tuma luga eficaz.

ATIA atrobe ta keda trece e seriedad I consecuencia pa henter nos Isla dilanti ora e cadena di importacion kibra, I e accion di Douane awe mainta ta un kiebro serio cu consecuencia hopi negativo pa comercio I nos economia, afectando e.o nos pilar economico turismo, cu ta depende di container di producto frieu pa hotel I restaurantnan pero tambe comercio I economia en general

ATIA ta spera cu Sindicato di Douane realiza con hopi Aruba ta depende di nan I ta hasi un apelacion pa promer cu tuma un accion di sera nos waf, pensa ariba e consecuencia cu esaki tin pa pais Aruba.

ATIA ta spera cu e accion aki ta uno cortico I ta keda vigila e situacion cu a reina awe mainta di cerca.